20150128-王慧麟：集中營

王慧麟：集中營
2015年01月28日


香港有冇集中營？當然有啦，不過唔係依家。香港殖民地年代，港英做咗唔少壞事（好事都有，哦！）。最近英國駐港嘅一姐，高調干預香港內政，一次飯局之中向立法會議員力陳要袋住先，又響另一次早餐式活動向泛民學者痛陳政改方案若果失敗，香港將會失去民主機會云云。你話依家英國佬響香港，係做緊好事定係壞事呢？

英國政府是否可信？it depends啦！不過有樣嘢佢哋好厲害，就係抹走記憶，亦唔介意殖民地民抹走記憶。舉例，香港殖民地時期，有成一百五十幾年，斷估都有唔少殖民地建築，畀人感覺佢偉大又好，x街都好，總算係歷史記憶。諸君去大馬檳城，赫然發現時光倒流，以為去咗1970年代之香港（我都步入中年，但依稀仲有些少記憶），行一轉個心都會離一離。但係香港呢？深水埗見到一兩棟都已經係幸運，何況係一排一排咁樣響條街嗰度畀閣下懷緬殖民地風情呢？

因為英國佬眼中，殖民地嘅嘢，又唔係自己地方，保育嚟把鬼？你哋殖民地人民，要拆要起，悉隨尊便。所以，拆得就拆，搞得就搞。英國佬最叻就係一筆抹走佢。呢啲路數，去到今時今日，一樣響官僚系統之中浮現。

以前響英國讀書，讀到一啲有關反殖運動，英國佬點樣對付反抗運動人士，招數拍得住美帝響伊拉克阿布格雷布之做法，睇完都驚一驚。返咗嚟香港，做1967年暴動之相關採訪，先至留意到摩星嶺有一處叫「白屋」之地方，係用嚟囚禁政治犯。

做訪問嗰陣，同一位（後來過身）老人家傾到摩星嶺被囚禁之待遇，見到佢潸然淚下。係㗎啦，派單張坐監之監獄，同響白屋之遭遇，係兩件事。當年之熱情左派青年，派反殖單張，之後坐監，再放出嚟，然後依家飛黃騰達，仕途亨通的有之，亦有放完出嚟，冇人點理，背負案底，無法上位的亦有。但講到獄中待遇，一定唔係白屋咁樣攞命。打到飛起有之， 24小時著燈不知白晝夜晚有之，逼供有之。後來睇返其他前英國殖民地，嗰班英國佬對付反殖人士之做法，原來個個殖民地政府都係咁樣。

所以，當見到摩星嶺畀一間咁有商業味嘅大學去搞商學院，個心真係奇怪。話晒嗰度係扣押咗一批畀港英暴政下扣留之反殖左派人士，理應係一個好地方，做一個博物館之類，等香港新一代青年，至少知道港英殖民地時期之「衰嘢」，冇理由變成MBA課室畀人搵真銀？

不過無所謂啦，反正都係保育，聽講間大學會保留該建築物，都好，起碼唔拆。但早幾日新聞見到，原來外貌保存，但係變成課室，任由一班全球商界精英行來行去，哈哈！真係過癮。至少都要搞導賞團，畀香港青年知道一下港英點x街都好呀？係咪？

我估該位已作古之摩西嶺難友，假如泉下有知，激到翻生都似。