20150223-葉朗程--情陷夜中環：瘋水
情陷夜中環：瘋水
20:07 23/2/2015
■早年曾跟師傅看凶宅，師傅叫筆者入廁所查吓塊鏡是否裂開，答案果然係裂咗。 互聯網
每年的年廿九是重要日子，比年三十晚更重要，比大年初一更重要，比自己的牛一更更更重要。誇張啲講，it is a holy day。
好兄弟Benson在美國的甜品課程還有幾個星期才圓滿結束，但他也專誠向烹飪學校請幾天假，為的就是在年廿九當天趕得及回港。如此隆重其事，一年復一年，風雨不改，因為年廿九當天必定要見一個人，一位就算上刀山落油鑊也非見不可的高人，他是我們尊貴的師傅。一寫師傅，內容難免讓人覺得誇張。雖然誇張，但一點也不失實，因為師傅的術數的確是神級境界。料事如神四個字，師傅當之無愧。
我和師傅認識的緣起，是凶宅。有沒有見過凶宅？我不但見過，亦去過，更仔細參觀過，每次回想起也打個大大的冷震，而那次就是我和師傅第一次見面，冇多冇少，是七年前的事。可以清楚記得是七年前，因為那年是香港人最艱難的時期，但有位客戶竟然手持大量現金，更要選擇入市買樓。為方便敍述，就叫客戶做薛先生。
一面破鏡 盡顯師傅威力
全城跌入谷底，薛先生卻可以坐擁充裕現金，是因為他任職合夥人的跨國律師事務所，在前一年剛好被英國一家律師樓收購。被收購後，薛先生和其他合夥人之後的分賬比例，其實會有輕微下跌，但沒有人有任何怨言，因為完成收購後，每位equity partner均會獲分一次性的stay-on bonus。所謂stay-on bonus，或者有啲人叫retention bonus，即是收購方給予被收購方合夥人的一次性分紅，條件是合夥人必須同意留在公司一段時間，好讓這個收購過程能順利完成。薛先生這個例子，留三年的 stay-on bonus是四百萬，美金，老虎蟹都留。
薛先生當年剛好四十歲，但性格是貪玩鬼馬一類，但就連爛玩如我之輩，也覺得他玩得太激。「睇唔睇凶宅？」薛問。吓，點解要睇？「我想買樓嘛，凶宅平九成，唔係唔睇啩。」盛情難卻，況且人人皆有好奇心，既然有人陪，姑且看看。就這樣，因為薛先生，我第一次睇凶宅，也第一次認識師傅，地點是凶宅那座大廈的大堂。
「師傅你好。」我禮貌地伸出手。師傅瞧着我，沒有伸出手，只是跟我說：「一陣間，你行頭。」我我我我我我行頭？點解呢？「你陽氣盛。」唔係啩，有幾盛？「企喺你隔籬，我熱到可以着少件衫。」好多女仔都係咁講，但係你德高望重喎，都係你帶頭好啲。「唔好嘥時間，你行定唔行？」就這樣，我們一行三人走入升降機，然後很快就到。
一梯雖然只得兩伙，而兩伙的大門雖然一模一樣，但我可以肯定，「目的地」是左手邊那間。就在這時候，薛先生也站在我後面問：「係唔係左手邊？」師傅點頭確認，我和薛生竟然不自覺地挽着彼此的臂彎。凶宅就是這樣的一回事，你根本不用走入去，光是站在外面，你已經感覺到內裏的不妥。何謂不妥？很難解釋，如果硬是要解釋，就是有種you know there is nothing inside but you can tell there is something inside的詭異。
打開門，立刻感到陰風陣陣。所謂陰風，其實根本無風可言，但你就是會有種體溫突降的感覺。文筆有限，不懂怎樣形容，但總之就是每個角落都讓你看不透某些地方似的。凡人看極看不透，但師傅厲害之處，就是不用親自看也已經可以看清看楚。「你，入去右邊最尾間房個廁所睇吓，塊鏡係唔係裂咗。」裂裂裂裂裂裂咗？咁大鑊？「係呀，睇吓啦。」又又又又又又係我？「去啦，男人大丈夫。」你唔係男人，我心諗。我一個箭步飆入最尾間房，再一個箭步飆返出嚟，呆得徹底，我沒有說甚麼，只是跟師傅點點頭。鏡，的確是裂的。師傅說：「此地不宜久留，閃！」
也許卡通一點，但若然你置身其中，一定笑唔出。自此以後，我也沒有問過師傅那面鏡的事，但我對他已經是佩服得五體投地。葉朗程迷信嗎？坦白說，我不覺得自己迷信。大年初一我會洗頭、年初二我會買鞋、生日切蛋糕我一定會切到底，管他甚麼年年有餘。但我敬重、佩服、相信師傅，完全是因為他的計算。
師傅常說，所謂命運，其實就是一盤數。那盤數怎樣計？由你出生那刻開始，那組叫時辰八字的數字將會永遠跟隨你，無論你喜歡與否，那組數字會為你開出一個命盤，而這個命盤就是你人生的一幅畫。高深之處，就是看你如何解讀這幅畫。就正如我跟你一起看着一幅畢加索，你可能睇到好多messages喺裏面，而我就乜都睇唔到。所謂術數，就是看你如何解開畫中的密碼。
命運難改變 態度要正面
「上年同你講過，今年你開始轉運，記得嗎？」師傅拿着兩張紙說，而這兩張紙就是我的命盤。別誤會，轉運的意思並不是由衰運轉好運或好運轉衰運的意思。簡單嚟講，我們每十年就會轉一次「車」。一班車搭十年，冇多冇少，所以轉運的意思就是「轉車」，即是由今年開始，未來十年將會有重大變化。「錢財冇嘢好擔心，之後你會有更大權，受你影響嘅人越嚟越多。」師傅繼續，我沒有飄飄然。「不過……」see，預咗佢會有「不過」，人生after all就是一連串的「雖然」和「但是」。師傅，請講。
「師傅講得俗啲，希望你印象深刻啲，介意嗎？」我都未開口，Benson已經搶着回答：「唔介意唔介意！佢個人都好俗㗎，師傅你講啦。」師傅開始說，我細個嘅年代，廁所叫做屎坑，聽過嗎？「聽過。」我說。屎坑有幾臭，想像到嗎？「想像到。」非常好，咁你想像吓，你要入去一個咁臭嘅屎坑辦大事，竟然會有人咁好心，攞住叠草紙入嚟屎坑畀你，驚死你冇得用，你覺得呢個人點？「係壞人。」講得啱，師傅成日話你個人機靈，但呢個人會喺猴年出現，當佢出現嘅時候，就算你幾機靈都唔會察覺到。
「佢會做啲乜？」Benson代我問。呃錢囉，唔通騙你色？男人嚟㗎。「有冇得化解？」我問，而我知道自己是多此一問。師傅未說答案，我已經可以在心裏先說出來，太清楚他了。果然，師傅不耐煩的嘆口氣，然後說：「我話畀你聽，唔係要教你避，因為……」師傅未說完，我和Benson已經把他要說的說出來：「因為根本冇得避，我話畀你聽，係要你知道，等你之後容易啲接受。」
既然劫數難逃，既然命盤無法改變，既然一切一切已經是天意，那為甚麼人還要看風水命理？科學啲講句，因為我們人天生就有種optimism bias，即是我們都是天生過於樂觀的人。就正如你問一對新人，他們離婚的機會是幾多？他們會說是零，但實際上我們知道，現實世界的離婚率是三至四成。甚至乎，你可以問一些已經離婚和準備重婚的人，你們離婚的機會是多少？他們都會告訴你是「零」。
講得好聽啲，我們看風水，不是因為我們迷信，而是因為我們超級樂觀，覺得自己可以戰勝命運。如果你也相信師傅的話，命運是無法改變的，有錢冇錢，結婚離婚，整定。但師傅經常說，我們雖然不能改變命運，但我們可以改變態度。無論環境順逆，也當以最正面的態度面對。過年的時候，師傅永遠唔會祝我哋順風順水，因為順唔順是命數，不能強求。師傅每年給我們的祝福，比順風順水更實際。
祝你做個對得起自己的人，只要你對得起自己，就算在逆境中跌一跤，你所賺到的，會比在順境中賺到的更精采。各位，賺多啲。
葉朗程
20:07 23/2/2015
■早年曾跟師傅看凶宅，師傅叫筆者入廁所查吓塊鏡是否裂開，答案果然係裂咗。 互聯網
每年的年廿九是重要日子，比年三十晚更重要，比大年初一更重要，比自己的牛一更更更重要。誇張啲講，it is a holy day。
好兄弟Benson在美國的甜品課程還有幾個星期才圓滿結束，但他也專誠向烹飪學校請幾天假，為的就是在年廿九當天趕得及回港。如此隆重其事，一年復一年，風雨不改，因為年廿九當天必定要見一個人，一位就算上刀山落油鑊也非見不可的高人，他是我們尊貴的師傅。一寫師傅，內容難免讓人覺得誇張。雖然誇張，但一點也不失實，因為師傅的術數的確是神級境界。料事如神四個字，師傅當之無愧。
我和師傅認識的緣起，是凶宅。有沒有見過凶宅？我不但見過，亦去過，更仔細參觀過，每次回想起也打個大大的冷震，而那次就是我和師傅第一次見面，冇多冇少，是七年前的事。可以清楚記得是七年前，因為那年是香港人最艱難的時期，但有位客戶竟然手持大量現金，更要選擇入市買樓。為方便敍述，就叫客戶做薛先生。
一面破鏡 盡顯師傅威力
全城跌入谷底，薛先生卻可以坐擁充裕現金，是因為他任職合夥人的跨國律師事務所，在前一年剛好被英國一家律師樓收購。被收購後，薛先生和其他合夥人之後的分賬比例，其實會有輕微下跌，但沒有人有任何怨言，因為完成收購後，每位equity partner均會獲分一次性的stay-on bonus。所謂stay-on bonus，或者有啲人叫retention bonus，即是收購方給予被收購方合夥人的一次性分紅，條件是合夥人必須同意留在公司一段時間，好讓這個收購過程能順利完成。薛先生這個例子，留三年的 stay-on bonus是四百萬，美金，老虎蟹都留。
薛先生當年剛好四十歲，但性格是貪玩鬼馬一類，但就連爛玩如我之輩，也覺得他玩得太激。「睇唔睇凶宅？」薛問。吓，點解要睇？「我想買樓嘛，凶宅平九成，唔係唔睇啩。」盛情難卻，況且人人皆有好奇心，既然有人陪，姑且看看。就這樣，因為薛先生，我第一次睇凶宅，也第一次認識師傅，地點是凶宅那座大廈的大堂。
「師傅你好。」我禮貌地伸出手。師傅瞧着我，沒有伸出手，只是跟我說：「一陣間，你行頭。」我我我我我我行頭？點解呢？「你陽氣盛。」唔係啩，有幾盛？「企喺你隔籬，我熱到可以着少件衫。」好多女仔都係咁講，但係你德高望重喎，都係你帶頭好啲。「唔好嘥時間，你行定唔行？」就這樣，我們一行三人走入升降機，然後很快就到。
一梯雖然只得兩伙，而兩伙的大門雖然一模一樣，但我可以肯定，「目的地」是左手邊那間。就在這時候，薛先生也站在我後面問：「係唔係左手邊？」師傅點頭確認，我和薛生竟然不自覺地挽着彼此的臂彎。凶宅就是這樣的一回事，你根本不用走入去，光是站在外面，你已經感覺到內裏的不妥。何謂不妥？很難解釋，如果硬是要解釋，就是有種you know there is nothing inside but you can tell there is something inside的詭異。
打開門，立刻感到陰風陣陣。所謂陰風，其實根本無風可言，但你就是會有種體溫突降的感覺。文筆有限，不懂怎樣形容，但總之就是每個角落都讓你看不透某些地方似的。凡人看極看不透，但師傅厲害之處，就是不用親自看也已經可以看清看楚。「你，入去右邊最尾間房個廁所睇吓，塊鏡係唔係裂咗。」裂裂裂裂裂裂咗？咁大鑊？「係呀，睇吓啦。」又又又又又又係我？「去啦，男人大丈夫。」你唔係男人，我心諗。我一個箭步飆入最尾間房，再一個箭步飆返出嚟，呆得徹底，我沒有說甚麼，只是跟師傅點點頭。鏡，的確是裂的。師傅說：「此地不宜久留，閃！」
也許卡通一點，但若然你置身其中，一定笑唔出。自此以後，我也沒有問過師傅那面鏡的事，但我對他已經是佩服得五體投地。葉朗程迷信嗎？坦白說，我不覺得自己迷信。大年初一我會洗頭、年初二我會買鞋、生日切蛋糕我一定會切到底，管他甚麼年年有餘。但我敬重、佩服、相信師傅，完全是因為他的計算。
師傅常說，所謂命運，其實就是一盤數。那盤數怎樣計？由你出生那刻開始，那組叫時辰八字的數字將會永遠跟隨你，無論你喜歡與否，那組數字會為你開出一個命盤，而這個命盤就是你人生的一幅畫。高深之處，就是看你如何解讀這幅畫。就正如我跟你一起看着一幅畢加索，你可能睇到好多messages喺裏面，而我就乜都睇唔到。所謂術數，就是看你如何解開畫中的密碼。
命運難改變 態度要正面
「上年同你講過，今年你開始轉運，記得嗎？」師傅拿着兩張紙說，而這兩張紙就是我的命盤。別誤會，轉運的意思並不是由衰運轉好運或好運轉衰運的意思。簡單嚟講，我們每十年就會轉一次「車」。一班車搭十年，冇多冇少，所以轉運的意思就是「轉車」，即是由今年開始，未來十年將會有重大變化。「錢財冇嘢好擔心，之後你會有更大權，受你影響嘅人越嚟越多。」師傅繼續，我沒有飄飄然。「不過……」see，預咗佢會有「不過」，人生after all就是一連串的「雖然」和「但是」。師傅，請講。
「師傅講得俗啲，希望你印象深刻啲，介意嗎？」我都未開口，Benson已經搶着回答：「唔介意唔介意！佢個人都好俗㗎，師傅你講啦。」師傅開始說，我細個嘅年代，廁所叫做屎坑，聽過嗎？「聽過。」我說。屎坑有幾臭，想像到嗎？「想像到。」非常好，咁你想像吓，你要入去一個咁臭嘅屎坑辦大事，竟然會有人咁好心，攞住叠草紙入嚟屎坑畀你，驚死你冇得用，你覺得呢個人點？「係壞人。」講得啱，師傅成日話你個人機靈，但呢個人會喺猴年出現，當佢出現嘅時候，就算你幾機靈都唔會察覺到。
「佢會做啲乜？」Benson代我問。呃錢囉，唔通騙你色？男人嚟㗎。「有冇得化解？」我問，而我知道自己是多此一問。師傅未說答案，我已經可以在心裏先說出來，太清楚他了。果然，師傅不耐煩的嘆口氣，然後說：「我話畀你聽，唔係要教你避，因為……」師傅未說完，我和Benson已經把他要說的說出來：「因為根本冇得避，我話畀你聽，係要你知道，等你之後容易啲接受。」
既然劫數難逃，既然命盤無法改變，既然一切一切已經是天意，那為甚麼人還要看風水命理？科學啲講句，因為我們人天生就有種optimism bias，即是我們都是天生過於樂觀的人。就正如你問一對新人，他們離婚的機會是幾多？他們會說是零，但實際上我們知道，現實世界的離婚率是三至四成。甚至乎，你可以問一些已經離婚和準備重婚的人，你們離婚的機會是多少？他們都會告訴你是「零」。
講得好聽啲，我們看風水，不是因為我們迷信，而是因為我們超級樂觀，覺得自己可以戰勝命運。如果你也相信師傅的話，命運是無法改變的，有錢冇錢，結婚離婚，整定。但師傅經常說，我們雖然不能改變命運，但我們可以改變態度。無論環境順逆，也當以最正面的態度面對。過年的時候，師傅永遠唔會祝我哋順風順水，因為順唔順是命數，不能強求。師傅每年給我們的祝福，比順風順水更實際。
祝你做個對得起自己的人，只要你對得起自己，就算在逆境中跌一跤，你所賺到的，會比在順境中賺到的更精采。各位，賺多啲。
葉朗程
留言
張貼留言