20141030-王慧麟：斷氣？有排你捱

王慧麟：斷氣？有排你捱
2014年10月30日


政黨大少之政協職位，忽然被奪，睇落去好似同佢請路福西領袖下台有關係。不過，人事變動嘅嘢，非一日之寒。發爛渣呢樣嘢，往往都係有積落的心結。
我份人好膚淺，只係相信坊間所言，政黨大少之被飛，同佢叫人請辭有關。其實，路福西領袖大把本錢，何須辭職呢？直情要留到最後一刻兼連任添！
早幾日，兩間大學之民調機構，不約而同公布咗，路福西領袖之評分。呢方面，兩大的評分都係創新低。中大方面，評分為38.6分，跌破40分，係佢上任以來新低。
評分方面，另一組數據來自港大民意研究計劃。佢哋出來的結果係38.9分，都係跌穿40分。睇落去兩組大學之分數可見，政黨大少響呢個時候出聲叫上面換人，表面上都幾反映民意的走向。
但我一直都提倡，要睇多一組數據，至少都可以有多一個參考。港大民調的另一條問題，係我一直以來都叫大家參考的數字。呢條問題係假設性投票問題。題目係問，「假設明天選舉特首，而你又有權投票，你會唔會選梁振英做特首？」。呢條問題的結果，係投票支持路福西領袖，都有23%。呢個數字，已經係今年最低了。
我畀一個參考，響老董下台之前，佢響呢條問題之下，最低見12%，係響2003年7月中做的調查。至於佢腳痛之前幾個月，曾經最低見13%。從呢堆數字可見，如果要路福西領袖下來，單係用民意迫佢下台，社會上就要有極大共識至得。要將呢個人的支持度，至少要跌破20%至得，否則好難夾到佢下台。
講到呢度，大家應該看到隻象。真真正正嘅象。路福西領袖，點樣差都好，今年以來，路福西領袖的支持度，由今年初高峰之29%，慢慢地向下。用咗8個月，反對佢嘅人，最終都係無辦法將佢嘅支持度，大幅度扯跌。依家充其量都只係23%。今年以來，路福西領袖冇話佢唔會上戰場打仗，只係，佢場場硬仗殺埋身，似乎只能夠令數字由29%質落去23%，咁樣，如果我係路福西領袖，點可能請辭呢？
23%係乜嘢概念呢？假如香港有300萬左右的選民，即有69萬人支持路福西領袖。呢69萬之路福西領袖粉絲，都冇因為佔中影響投票，呢班都係鐵桿粉絲。喂！69萬人支持路福西領袖，唔簡單㗎。一個人手上有咁多票，又點會輕易認輸呢？
所以，大家千祈唔好以為領袖評分低，支持率就一定會降。兩者冇乜必然關係。舉例，你對呢個老細印象唔好，你勁唔鍾意佢，咁你對佢評分低，係一個內心表達出來的東西。但係，老細之所以成為老細，佢未必一定要走，因為大家可能會怕，萬一老細走咗，換咗一件仲差啲嘅人，咪好捉蟲。所以，響呢條問題上，佢哋可能會畀路福西領袖評分差，但就唔一定同意佢落台！


倫敦大學亞非研究學院法律系博士