20160224-渾水：長者iBond的巧妙

渾水：長者iBond的巧妙
2016年02月24日

傳政府將推出長者iBond。 (資料圖片)

早幾日新聞報道，政府今年將會推出長者通脹掛鈎債券，亦即長者iBond，顧名思義，即係過65歲的老人才有資格認購的iBond。
長者iBond同傳統iBond的分別基本上幾點講完。第一，前者只有長者先可以認購；第二，無論通脹點，前者會保證2%，後者只保證1%；第三，前者無二級市場，後者有二級市場。
長者iBond同傳統iBond也反映不同人的投資心態，好像略懂投資的中產，佢哋覺得，iBond的性質係「投資品」多過「年金」，部分人會借孖展抽，然後上市第一日就車出街，沽貨賺差價。
相反，老一點的認購人投資習性係覺得似「年金」多過「投資品」，選擇收息收到maturity。
至於點解2%同1%會有分別，渾水覺得，那是因為有無二級市場的分別。因為流通量有溢價，所以這個差價的反映，要靠那1%去補償番。因為長者是把iBond看成「年金」，所以有無二級市場都無乜所謂，但後生仔、中年人現金流周轉相對快，這1%的溢價明顯不夠。尤其是現在市況太差，渾水更感受到流通量的珍貴，好多時唔係我唔想止蝕，而係無承接俾我止蝕，唯有硬食。大概政府都覺得1%的流通量差價太少，但又孤寒，所以索性唔預後生仔、中年人玩。
iBond不是年輕人喜歡的投資品，因為年輕人的投資態度進取，所以會嫌回報不吸引，而且投資選擇都多，輪唔到iBond。

大概只有一個情況我才會考慮iBond，就係通縮的時候，因為根據現在的設計，回報是保證了1%。通縮時cash is king，錢的購買力會發揮到最大，而且同期的投資品回報通常比較弱，如果有投資品仲派到1%息，其實已經好巴閉。
雖然會預繳一筆錢，但正如上面所講，反正通縮都無咩好投資，不如買iBond收定息好過。通脹掛鈎債券設計的特點在於通脹時，iBond只能平水，不是報道所講用來「對抗」通脹；反而通縮時，通脹掛鈎債券會更吸引。原理就好似熱狗無狗，星洲炒米無星洲。
講開又講，通縮的時候，iBond應該唔叫iBond，叫dBond。雖然好荒謬，但唔好認為無機會發生，因為你知啦，福利有剛性，派開的福利好難斷尾，所以通縮都可能繼續有dBond派。尤其是依家政府民心差，係要維穩派派糖，咁先可以鎮住班中產民心。


作者為九十後財經傳媒人、粗讀經濟學的偽文青
https://www.facebook.com/muddydirtywater