20160226-渾水：點評1號至7號的股票

渾水：點評1號至7號的股票
2016年02月26日


今次講股票，一連講七隻。
長江和記實業(001)：自從公布了世紀重組合併的大刁出台後，股價潛了水。市場也個個無乜反應，一直都非常低調，無乜人理，可能背後有好強的操盤手控制大局，會冷不防炒高。但內情我自己、又或者好多股民都唔多了解，所以無乜好講。
中電控股(002)：本來是以香港業務為主，不過，近年注入新思維，除了香港的公用電力業務，仲學人發展第三道路，走出海外，上年就投資雲南、越南等業務。
呢類牆頭草，容易坐這山，望那山，一事無成。最近有條廣告片，我相信股民會覺得低俗趣味，唔多buy。
中華煤氣(003)：股如其名，心繫中華，向中華靠攏是無可厚非。大家對佢的底蘊都無乜好跟進，股民都明白。
唯一一個小建議：通常大公司都會請法律顧問，希望煤氣小心少少，唔好聘請一些明明執唔到業，但又話自己係執業律師的小丑騙飯吃。
九龍倉(004)：相對頭幾隻股票，好像比較獨立，只專心處理海港城、時代廣場，但其實同內地房產商好多瓜葛，佢同綠城(3900)、融創(1918)好多麻煩，互相「」對方的股權，參與緊一場股權爭奪戰。
滙豐控股(005)：以前股民眼中做實事的股票，不過，名聲一般般。主要困難係無人罩住，去到美國又俾人當ATM罰錢，去到中國又唔夠國內競爭對手突出，近期股價創新低。
不過，爛船都有三斤釘，至少都仲有恒生(011)呢個地區性銀行支援，但很難看好。
電能實業(006)：一隻充滿分離意識的股票，本身有機會同母體長江基建(1038)合併，回歸大集團，不過，聰明的小股東覺得太不合理，所以強行推掉了。
本身和港燈(2638)分拆了，分拆未必唔好，大家獨立有各自的企業營運目標，話唔定係一條血路。因為電能比較積極尋找發展海外的機會，這是比較有活力的股票，很有潛質。
凱富能源(007)：查看過董事局基本資料，無乜大問題，但成隻股票俾人信心不足，因為好多時買股票不只是買個人，而是as a whole咁考慮去買。
這是一隻陳年殼股，經常變身，一時又搞金融、一時又搞能源，其實有個別業務定位唔清晰，好難俾到信心人。
由始至終，我都係講緊股票，而我個人是偏好6號的電能實業。
順帶一提，新東投票在即，新界東候選人包括：劉志成、黃成智、周浩鼎、梁思豪、方國珊、梁天琦和楊岳橋。無論投乜都好，請選民珍惜自己的公民權利。


作者為九十後財經傳媒人、粗讀經濟學的偽文青
https://www.facebook.com/muddydirtywater