20180627-月巴氏：我的CV，就是我的Daddy~~

月巴氏：我的CV，就是我的Daddy~~
23:28 27/6/2018


人生如夢，但返工不是夢。返工，由始至終都不是發夢，而是好實實在在的一件事。

由寄CV到有得見工到真係見工到搵到份工到第一日返工……都不能發夢，都是一場場（贏面極低的）戰鬥。

早在中五考完會考後我已面對呢場戰鬥。在冇人威迫的情況下，等緊放榜的我，自願前往勞工署搵暑期工，結果真係俾我搵到一份工，一份蠟燭廠的工。

最開心是，成個過程由頭到尾，對方冇要求過我提供甚麼CV。

事實是，當時的我只知ATV而根本不知甚麼是CV。

撇除頭幾日唔知頭唔知路而俾阿頭話過幾句，自問工作表現尚算不俗，我亦做足阿頭Order落的大小工作：搬貨、包貨、上貨、落貨種種粗重工作——無論工作有幾粗重，我都沒有講過一句：「千祈唔好呀！」也沒有講過半句：「可以唔做，我盡量都唔做！」直至好多年後我才明白，對於自己唔想或唔制的事，其實有權Say No，就好似梁耀忠。

即使日搬夜搬，但我需要澄清，我不是做苦工（當日那張招聘告示寫的不是聘請搬運工人），我的真正身分，是一個蠟燭製造員，需要從事講求技術的蠟燭製造工作。

製造過程如下：先（在氣溫高達攝氏35度的廠房）將熱辣辣的蠟倒落一部金屬製機器，待蠟冷卻，然後就將一碌碌凝固好的蠟燭，用妙到毫顛的陰力取出，Finished。

透過那兩個月的工作我發現了一點。原來過去五年中學生涯（至於六年小學生涯和兩年幼稚園生涯就按下不表），阿Sir搣時教我 & 我所學到的，對我返呢份工完全冇幫助：Maths堂教的Sine、Cosine、Tangent無助我整一碌完美的蠟燭、Physics堂教的力學無助我去搬一袋重逾25磅的石蠟，也無助我去把一架載滿貨的織車完美操控……理科科目冇鬼用，文科科目亦唔好得去邊：文學堂教的那篇韓愈《師說》，無助我令高層喜悅；地理堂教的不同地形，無助我把超重的貨變得輕盈；最廢的首選中史，中史阿Sir教的秦統一六國原因，竟然無助我處理廠房內的人事鬥爭（返暑期工一樣會面對人事鬥爭）。

讀書醒唔醒 & 考試叻唔叻，同個人工作表現勁唔勁，不含有任何邏輯關係。

So，我是真心認同鳴煒兄所講，大學畢業不一定變中產，畢竟好多大學生都貨不對辦——讀書再醒 & 考試再叻，都只是寫在CV上，但求誘騙人哋In你And Then請你的伎倆。
但如果當年我不搏老命考A-Level以求博到一個大學學位，反而將那份蠟燭廠暑期工延續成長工，專心一意整蠟燭，到了未來，我除了Keep住整蠟燭，仲可以做乜？即使有幸被嗌去見工，但當人哋問我攞CV時，難道我可以拎出一碌親手兼精心製造的蠟燭，就當堂令對方感觸？

而重點是，對大部分啱啱出嚟搵工的人來說，如果連大學學位都冇個傍身，我諗連萬三蚊都搵冇。

塵世間大抵只有一類人認為CV冇用——就是本身不用寫CV就自動得到一份工的人，而佢份工的職銜是：老闆。

Honestly，我絕不仇富（否則有朝一日我發達，我咪要仇視自己？），我只憎成日塞錢入我袋（但其實沒有塞真金白銀入我袋）的有錢仔。


月巴事