20200225-千頌C：【收市閒情】醫管局「不能買的口罩」

千頌C：【收市閒情】醫管局「不能買的口罩」
23:03 25/2/2020


有心人向醫管局捐出口罩，但最後因為口罩係黑色而拒收。

講個笑話畀大家聽吖…… 從前有個醫管局，佢買唔到口罩。

係呀，好好笑㗎。點好笑？話說上星期，一班有心人搵來一大批韓國口罩，仲要係相對貴嘅KF94，諗住全數捐去醫管局，叫做為醫護紓解燃眉之急。數量話多唔多，話少唔少，都有4萬個㗎！

好啦，有人出錢，有人出力，萬事俱備，只欠收貨！經人穿針引線下，聯絡上醫管局……然後，就由呢一秒鐘開始，醫管局嘅反應，會令你唔單止懷疑人生，甚至懷疑世界。

首先，當你話你有口罩想送畀醫護，醫管局表示：「你先畀7隻口罩我驗，我哋check完過幾日覆你。」OK……嘅，作為專業醫護，對口罩有要求係應該嘅，幾日啫，大家都等得。點知……問多兩問，「係啦，批口罩咩色呢？」黑色。「黑色，咁不了。」

聽到呢度，相信大家都好明，點解醫管局買唔到口罩。連免費嘅口罩，佢都要驗7次，仲要等幾日先覆你……咁你可以幻想到，當佢哋真金白銀畀錢嘅時候，都應該係差唔多咁嘅情況，「你批貨睇落OK，靚嘢，但你畀7隻我驗，驗真冇問題過幾日我扑鎚！」呢個時候，唔好話幾日呀，幾分鐘批貨都俾人搶咗啦！

再講落去，「黑色？不了」，醫管局坐享其成，仲可以有「不能要的口罩」？我明，黑色口罩，容易招人話柄：「呢隻咪暴徒口罩？」天啊！醫護上戰場，足夠裝備乃人命關天，呢個時候仲政治行先？難道消防入火場救火，要拎鐵筆破門，你會話，「呢個唔用得，同暴徒用嘅武器係一樣！你徒手撬啦！」

醫生朋友，聽到我哋嘅經歷，嬲到着晒火：「HA落咗order，由今個星期開始，唔可以再book elective照腸鏡！知唔知點解？好明顯係因為唔夠PPE！」醫生就解釋，如果有人屙血，經檢查後醫生係可以叫病人照腸鏡，但依家一律唔畀！除非點呢？病人入咗急症，大量屙血，屙到一個點係，如果唔照唔醫一定會死，先可以去照一照。

咁換言之，想及早發現、及早治療？Sorry，唔夠裝備噃！點解唔夠？咁就要問返醫管局係咪太離地、太官僚啦。

買口罩，就跟足指引，買來買去都買唔到；
起檢疫中心，就因應疫情，無招標直接搵人起；
唔封中國關，就因為唔想助長歧視、針對性排斥；
封南韓關，就因為控制疫情，將社區傳播截斷。
公我贏，字你輸。呢個政府，真係好有趣。


by千頌C@堆填區
http://fb.com/winbigwok/