20141126-王慧麟：發洩精力論

王慧麟：發洩精力論
2014年11月26日


響北方一間大學工作嗰陣，查實全年無休。暑假期間，老師返鄉下，我等依然要北上工作。到咗近開學日子，就會全校都動起來。最令人感到一種清新嘅氣息，就係新生入學。
新生入學唔奇怪。但大學開學之前，就會有軍訓。大概十幾日左右。有時候，坐車經過，一班年輕人穿好制服鍛鍊，個個樣子都好鬼辛苦。
有老鬼話，其實依家啲部隊都知道，軍訓方面，個個都講到個訓練好辛苦云云，實際上都係走過場。因為依家幾乎全部都係一孩政策長大嘅小朋友，自小屋企萬千寵愛，有啲比較疏於強身健體，有啲就因為家長對於細路相當緊張，都怕軍訓期間，新生會出現身體不適等情況。
響呢個情況下，好多教官其實已經調整咗強度，訓練期間都盡量照顧學生，例如佢地會挑選樹蔭底下訓練，讓新生冇咁辛苦，另外又響時間上有彈性，等班新生唔會長年累月咁樣鍛鍊而唔會太過勞累。
聽完老鬼講，軍訓真係有啲似中學體育2.0版。當然，嗰邊之老鬼，又點會知香港嘅中學體育係點樣？只不過，有時走過呢班新生之隊伍，有啲戴著眼鏡，有啲神情唔係咁鍾意，冇辦法也。如果打仗靠呢班新生，真係要打贏菲律賓軍隊都冇可能。
上面如此處理青年，要佢地受軍訓究竟為乜呢？當然，有好多理由啦，例如畀新生理解軍事訓練，同當年老毛年代的全民學軍，防避美帝進攻嘅心態相似；又例如有人會認為，依家上面一孩政策，個個家長當孩子係寶，查實都係應該響入學嗰陣吃下苦，等細路有啲紀律性同服從性云云。當然，亦有講法係，青年往往係反對政府聲音之溫床，透過軍訓，等佢地之思想，導向比較正面及務實，唔好一味走向負面，同埋發洩一下多餘之精力云云。
我都好少聽到，一個政府會懼怕青年，或者有人會覺得，移民會因為青年人之問題。香港之青年，同其他發達國家之青年(即係所謂後物質時代)嘅成長背景，社會形態，家庭狀況都有相似之處。不過，香港同其他發達國家最大嘅分別，就係香江青年面對嘅，係一個不民主之政制，以及長期管治失當之社會形態，咁樣，香江青年之憤怒，有更多人係關心埋香江之政治發展。
但係，同西方國家之青年一樣，即使青年非常關心社會及政治，呢班青年之中，激進到日日上街兼長期抗爭嘅，都唔慌係主流，始終都係小部分嘅青年，大部分嘅，係，佢地係關心社會，反對不民主政制，但亦好顧及手上之學業，關心自己之將來。
所以，學生運動固然要走入群眾，但可能更要先動員自己身邊嘅同學。


王慧麟