20151030-浪漫月巴睇女星 - 月巴氏：第50位女星，不死子珊。

浪漫月巴睇女星 - 月巴氏：第50位女星，不死子珊。
2015年10月30日


如題所示，這一篇已經是第50篇。心裡不期然有種好想隆重其事的感覺。 圖：Cuson

1. 就是因為這種隆重其事感，以致人選上，經過一輪痛苦掙扎。
2. 結果痛苦掙扎後，依然冇結果。只知道想寫番一個香港女星。
3. 大佬咁究竟寫邊個好吖？——我問自己個心，然後確認了一點：我心中從來沒有黃翠如(我實在不明白Why有人咁大膽話每人心中都有一個黃翠如)，但肯定有一個徐子珊——一個近年被叫/笑做「不死」的人。
4. Why我心中會有徐子珊？我不知道，只知道她選港姐那一年，我咁啱轉工，做娛樂編輯，不得不對娛樂加倍留意，而相當好彩地，當年香港仲有娛樂圈。
5. 記憶中，徐子珊這名港姐冠軍，認受性OK高，不像近年的，選完翌日已忘了她們的樣貌名字——而事實是，我根本就冇睇，亦唔Care。


6. 於是，有同事找了她做六版人訪，而咁啱，是由我編的(當時全部稿根本都係我編)，唔知點解地我編得特別用心。事後，有人話Why要訪問佢？又唔係紅，個人本身又冇乜故仔云云……但唔使好耐，娛樂版便出現了大量徐子珊新聞。是甚麼新聞？我不一一詳述了，反正你知的自然會知，就算唔知，一切已消散成雲煙。娛樂新聞的本質由始至終都是：肯寫(好或衰)你，便證明你有新聞價值，有觀眾鍾意睇你。
7. 因為一些(被認為不符合港姐身份的)言論，徐子珊險被雪藏；被高層照過肺，又冇事，繼續被力捧，拍劇，由最初不被睇好，到後來漸被睇好，2007年拍電影《跟蹤》做埋女主角——即使有人認為真正主角其實是梁家輝、任達華，但沒有「豬女」這角色，我可以好大膽咁講，齣戲可能依然好睇，但肯定冇咁好睇。對比徐子珊在TBB劇所需要的「放」——喜怒哀樂需要用力地如實地表達晒出來，「豬女」的特質，是「收」——她的工作需要她把自己在日常中完美地收埋，以免行蹤敗露。事實證明，入行只有三年拍戲經驗尚淺的履歷，正好符合「豬女」這個刑事情報科跟蹤隊新人的角色，她真的演繹到那種缺乏經驗值的戰戰兢兢，而同時又把港姐應有的豔光收埋(冇理由搵一個好紅唇烈燄極待撫慰的人去跟蹤罪犯吧)。


8. 是幸也是不幸。冇錯，徐子珊好快便擁有一個大家噏得出名的角色，擁有一次讓人難忘的好演出，問題是，咁多年來，好多人都似乎只記得她這一次演出……OK，我知我知，好多人都好記得她在《潛行狙擊》的姚可可以及《神鎗狙擊》的上官明珠，但你之所以咁記得，不是因為她在演繹角色上的呈現，而是因為她(被編劇巧妙安排再加上導演精心處理)的不死表現。
9. 是劇集連累演員？抑或演員拖垮劇集？好難定斷。但事實是，徐子珊由一個曾經被睇好兼有大量機會的新人，漸漸變成了一個笑話，由演出到言行到舉止——偏偏當這個明明令人笑的笑話去演出喜劇《My盛Lady》，又被認為懶好笑，甚或唔好笑，成件事當堂變成了一場最沉重的玩笑(我有睇《My盛Lady》，我看得出徐子珊好努力地去搞笑，只是偏偏遇上蝦頭這個太強橫的對手；最後安排蝦頭去扮徐子珊，這一個戲謔更加深了「徐子珊笑話」本身的可笑)……


10. 工作關係，有時我(會擺明為集郵)而去參與訪問。徐子珊，是我見得最多的女演員。有次送書俾佢，我咁寫：希望她能再次交出叫人難忘的角色，並強調是——電影角色。有人話我好串，但我真正想說的是：在現今電視製作環境思維及氣氛下，電視劇未免太局限了她。如果想再交出令人難忘的演繹，一定要搣甩現今電視劇所要求的「放」。我不知道徐子珊當日睇到後會點諗？會唔會覺得我呢條月巴好Q串？但我想講的，無非係咁。我是真心希望你的「不死」，可成為你演藝事業的形容詞。
11. 要交稿了，編輯J等緊。一年前，我估不到竟然可以寫夠50位女星，讓我用50個星期快速檢視了50個女星 / 女性的生命。Yes，這是最後一篇「浪漫月巴睇女星」，Thx！(完)


撰文：月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
最自豪是能夠獨排眾議欣賞王小鳳的美。更自豪是夠膽獨排眾議周圍宣揚鄺美寶的美。