20191230-Mr.Tregunter：【大棋局】美政策如何影響香港

Mr.Tregunter：【大棋局】美政策如何影響香港
2019年12月30日


Tregunter指，聯滙已實行36年，7.8港紙兌1美元在好多人心目中仿似理所當然，但銀紙之價值只係事勢宜然。

上星期提及，美國當年的《白銀收購法案》間接加速國民黨倒台，其實該法案對香港亦影響深遠。明清年間中國以白銀做貨幣，香港亦一樣。1841年鴉片戰爭之際，英國商務總監義律佔領香港，宣佈香港官方經濟活動用英鎊計數，但實際上民間係以大清銀圓、西班牙銀圓等混雜而用。

所以當1934年美國頒布《白銀收購法案》後，中國及香港同時面對白銀大量流失。中華民國政府被迫放棄銀本位，港英政府決定實行一種新制度，這個制度由1935年影響香港至今，就係成立外滙基金。英國接管香港後，有利、滙豐及渣打先後授權為香港發鈔銀行，以白銀儲備支持港紙信用度；成立外匯基金後，同樣由上述三家銀行發鈔，但要用英鎊或白銀向外滙基金換負債證明書方可發鈔。港紙由白銀支撐，過渡為由英鎊及白銀同時支撐。最初行固定滙率，1英鎊兌16港元；民間白銀則以每盎士1.28港元收購，禁止銀圓流通。

港紙有三大轉捩點，第一個係1934年美國買銀，第二個係1971年美國放棄金本位。原本二戰後美國國力最掂，亦揸住全球75%黃金儲備，在當時美元就係硬嘢。所以全世界跟布雷頓森林體系，即你揸住35美元，美國保你可以兌1盎士黃金走，美元自此又叫美金；美元盯黃金，他國貨幣盯美元。只係越戰後美國赤字嚴重，黃金儲備大量流失，尼克遜1971年宣佈美國放棄金本位，同時根據《1970年經濟穩定法案》凍結物價90日。隨後英鎊亦棄守固定滙率，香港被迫放棄外滙管制，港元改為同美元掛鈎實行浮動匯率，早期5.65港元兌1美元。

布雷頓森林體系瓦解後美元仍然弱勢，香港侷住又同美元脫鈎，改為單獨浮動。去到80年代香港出現前途問題，大眾驚共產黨打到嚟，1983年最低見9.6港元兌1美元。為此港英政府再出手，公佈聯繫滙率制度，自此港元兌美元穩定地訂於7.8兌1，是為港紙第三大轉捩點。

年末回顧港紙三次重大轉變，係因為聯繫滙率已實行36年，7.8港紙兌1美元在好多人心目中仿似理所當然。但歷史話畀我哋聽，銀紙之價值只係事勢宜然。用莊周先生嘅話，就係魚活在水中太久而不知有水。香港人安逸得太久，好多事其存在以為係自然，但消失也可忽然，例如公道。當一個政府已無能為社會維護公道，誰又會相信這個政府底下的金融秩序。


Mr.Tregunter