20190121-劉細良：林鄭迎難而上難聽過粗口

劉細良：林鄭迎難而上難聽過粗口
2019年01月21日


林鄭月娥於中環灣仔繞道通車儀式致辭時，指繞道建議早於1987年提出，幾經填海爭議、群眾運動、清拆天星和皇后碼頭等波折。她指今日香港又面對大型基建和土地發展帶來的種種問題，應該繼續「迎難而上」全力讓香港能向前發展。

「迎難而上」這四字真言真係難聽過粗口，林鄭月娥身處的政治環境，資源之充沛，環顧全世界都冇人比得上。在公共財政資源方面，香港人擁有的財政儲備過萬億，單單去年財政盈餘1,600億，今年環境冇咁好，但至少一定超過600億，以人均而言，堪稱全世界最有錢政府，超過新加坡。歐洲及日本各地政府面對人口老化，高福利難以維持，政府靠債務度日，一旦削減福利、加稅或延後退休年齡，定必引起街頭抗爭以至暴力衝突。

在權力方面，美國因總統與國會之爭，公共財政撥款停止，政府人員冇糧出。法國因加汽油稅觸發黃背心之亂。香港特首掌握之權力，在制度上完全不受民意及政黨制約，更不受政務官僚牽制，絕對可以閉門造車。背後仲有一個黨國系統支援，壓制反對派、操控傳媒，同時又進行統戰，掃除政治障礙。以老人綜援事件為例，建制派面臨選票流失之餘，仲要比林鄭當沙包打，打完就整色整水搞個下台方案，但建制派已經內傷，只有面懵懵扮冇嘢，因為後面有黨委睇場。試問林鄭為官，何難之有？

她之所以突出處境困難，原因有二：首先是期望管理，令中央更肯定她「志不求易、事不避難」之心。這等如跑數的銷售人員，永遠都同上線講「個市唔係咁好，好難開到單」。舉輕若重、諉過於人，乃永遠正確的打工智慧，亦是林鄭向習總書記政治「詐嬌」集氣手法。其次是她心有不甘，認為自己好打得為香港打拚，點解刁民唔領情，因為「反對派搞屎棍」。她視保育、群眾運動、司法覆核乃搞事，與她處處為難，所以才有「迎難而上」之說。一個特首獨裁體制，立法會奴才化、黨委控制輿論，如果做到決策高效及市民感恩，民望高企，咁就perfect嘞！但現實上正如黨所揭示的真理：「人世間的事業又怎會一帆風順呢？」又獨裁又要人歌頌，即係寸得嚟又要有型，大家又受落，有冇呢？有，呢種人只存在於反對運動、革命運動中，要為理想主義而活。


決策無民意基礎必引「三反」

香港管治真正難，非關保育、群眾運動或司法覆核，而是決策者本身無民意基礎，任何重大決策，一無與民共議過程，二無經民意授權，根本是由上而下北京指派的政治任務，這樣的施政，本身就必定引起「三反」：反感、反對、反枱。大灣區是習近平的重點項目，東大嶼山填海是配合大灣區，但整個融入大灣區計劃，有否問過香港市民一句？未計DQ、國歌法、國旗法、23條，邊一樣決定背後，係有香港主流民意基礎？

真正迎難而上的是無權無勢的普通市民，基建超支如流水，豆腐渣工程冇王管，但每年流感高峯期公立醫院照例變成人間地獄，醫護做到死。一小時強國人生活圈入侵住宅地區，商家佬笑騎騎，屈臣氏、萬寧多過食肆，但人人心裏苦。細個阿媽教落：「口賤得人憎、力賤得人敬」，今日終於在特首身上驗證了。


劉細良
時事評論員