20180416-方俊傑：「無聲絕境」—— 殺出一條新血路

方俊傑：「無聲絕境」—— 殺出一條新血路
2018年4月16日


我衷心佩服「無聲絕境（A Quiet Place）」的導演 John Krasinski，不單因為娶到 Emily Blunt 做老婆，還因為諗得出「無聲絕境」的概念。明明就是見慣見熟的「末世凶煞（Cloverfield）」，怪獸襲地球，人類死剩種一步一驚心，配合突如其來的聲效去營造驚嚇效果。個怪獸可以係外星人、係病毒、係變種生物，甚至係人類，類似橋段早早拍到爛晒。

「無聲絕境」居然諗得出行去另一邊的極端，創造一個連觀眾食爆谷都會全場聽到的靜默環境，又是一個新境界。你見到臨盆在即女主角一腳踩入長釘遍地鮮血，如果隨即聽到一聲痛苦咆哮，可能都會替她肉緊，但撕心程度肯定遠遠不及似現時見到大肚婆，還要死忍爛忍不發一聲慢慢拔出長釘。更妙是借一齣驚慄片，可以擺明車馬指明諷刺杜林普政府，試圖收緊言論自由，令人民怯於發聲的狀況。在中國應該要被視為禁片了。分分鐘是另一齣「訪．嚇（Get Out）」，因為充滿政治寓意，讓電影的層次被大幅度提升，衝擊奧斯卡也不是不可能。


講到幾隻聽力驚人的怪獸讓世界接近末日，人類文明好像束手無策，你話完全沒有不合理的地方，是騙人的，尤其結局安排，你可能會似我一樣，睇到爆出一句「有冇搞錯」。

無所謂，講到政府呀、軍方呀完全消失，一遇到危機便無能到喊，可能只係反映現實，係其他電影過分美化我們的領導人啫。我著重的，反而在一項細節：「無聲絕境」其實是一齣家庭倫理片，透過一開場的一次意外，令一家四口好像各懷心事，教育大家一家人應該坦坦白白，展示關懷，直頭要用「愛得太遲」做主題曲。


害我不能抽離的是，為甚麼電影要刻意交代兩夫妻在遭逢大劫後，仍然堅持要再次製造新生命？我知我知，嬰兒哭聲無法滅絕，可以製造最強戲劇效果，都要有合理原因去解釋為何兩個智力高超成年人，明知山有虎偏向虎山行啩？何況，他們本身已經有仔有女。

在「陰屍路（The Walking Dead）」，Maggie 大肚，都係因為曾經安定過，而且有朋友、有同伴、有社區，又接受了世界末日的現實；在「無聲絕境」，係連兩父子講句說話都要去瀑布底喎。我真係諗唔明點解咁都唔避孕？然後，太太一言驚醒，我意思是我的太太：「可能，導演編劇就係想警醒現代父母呢？你真係覺得你身處的環境好得過『無聲絕境』？你咪又係貪圖一時歡愉搞出人命？」有埋呢個解釋，「訪．嚇」贏到最佳劇本的話，「無聲絕境」簡直是最佳電影。


方俊傑