20190218-劉細良：大灣區計劃乃政治大炸彈

劉細良：大灣區計劃乃政治大炸彈
2019年02月18日


林鄭搵齊問責官員團隊開集思會，今次搵埋各司局新聞官出席，想話諗計搞好傳媒關係，方便政府推動施政云云。

特區政府及特首民望江河日下，同「關公災難」全無關係。三司內財政司及律政司民望低，係因為用錯人，「劏房波」叫到婦孺皆知，加上梁粉本色乞人憎，根本就不應留任。鄭若驊專業傲慢政治低能，亦非政治人才，處理放生梁振英案拆彈技巧拙劣，自製地雷，政治能力差過區議員。至於陳帆、楊偉雄及「智將」羅致光，全部都感染了一種由林鄭傳出的病毒，叫做傲慢，睇唔起政黨議員，更加睇唔起傳媒，認為社交媒體當道，新聞乃以訛傳訛。官員既無政治能力，又寸嘴好辯，特區政府自然一齊沉。


林鄭傲慢遲早出事

更嚴重問題根源自集思會主持人特首林鄭月娥本身，其傲慢早已在政務官系統廣傳，人人皆知。但今屆政府兩年下來更進一步惡化的是決策封閉獨裁，閉門造車，再靠議會內建制派強力動員通過，數夠票就算數，即使政治過程極醜惡，仍擺出一副「你吹得我脹咩」的態度。這種獨裁加傲慢遲早出事，相信整個政府都冇諗過因無厘頭收緊老人綜援而崩潰。林鄭未上場已暗地裏搞掂故宮分店落戶西九，所有持份者蒙在鼓裏，她不單冇反省且洋洋得意，認為自己有執行力。到了千億東大嶼山填海工程，又故技重施，公佈後細節欠奉，用幾多錢唔知、填幾大又一時一樣，負責的發展局局長黃偉綸面對傳媒灰頭土面。

次次林鄭特首均僥倖過關，試問又點會重視收緊綜援的諮詢工作？加上早已偷雞成功，在財政預算案撥款條例草案過骨，自鳴得意乃理所當然，同新聞官處理公關好壞同上述問題基本無關。記得上屆政府對立法會拉布抗爭口誅筆伐，今屆已經收緊議事規則，又刑事起訴尹兆堅及林卓廷，再配合DQ候選人，這種強硬政治手段已經令立法會成為予取予攜的橡皮圖章，林鄭理應施政暢通無阻，民望高企。正所謂福兮禍所倚，禍兮福所伏，一切來得太容易，加上習帝八字真言加持「志不求易、事不避難」，簡直就是大地在我腳下。

她另一個大炸彈已經爆發，大灣區規劃大綱出台，香港併入大灣區，這是關乎2047香港前途的重大問題，但特區政府從未就此諮詢香港人，過去都整色整水搞個策發會吸納民意，今次擺到明大石壓死蟹，由中央決定、發改委宣講頒佈，特首領旨執行。融入內地所引發的矛盾，已經由本土派擴散至專業醫護、中產階級。以林鄭作風，定必會將習帝交託之大灣區重任，堅決按中央指示執行到底，容不得香港人反對，總之是「理解要執行，不理解也得執行」。

董建華在沙士之後強推23條，為取悅北京中央，罔顧政治形勢，左毒上腦，今次大灣區計劃，在林鄭強硬作風下，好大可能會觸發傘運後大規模社會行動。


劉細良
時事評論員