20160318-葉紫微：《墮落星圖》 Maps to the stars 要墮落，有墮落

葉紫微：《墮落星圖》 Maps to the stars 要墮落，有墮落
2016年03月18日
AM730

當你為咗得到一個角色，或者太早成名，出事了。《墮落星圖》就有兩個character成功令你覺得極度噁心，娛樂圈係大染缸，應該不假。
片長：112分鐘
發行：Golden Scene

好多導演都鍾意將荷李活點滴當作題材，好似Richard Curtis都有兩部戲描寫得極為透徹，《Notting Hill》講紅透半邊天嘅Julia Roberts點樣同狗仔隊周旋；《Love Actually》過氣阿叔Bill Nighy要同新晉組合Blue爭一日之長短，當中提及到毒品同娛樂圈跟紅頂白嘅殘酷，荷李活有幾黑暗，心知肚明啦！如果前兩部片以愛情同搞笑手法表達，咁呢部就稱得上極為黑暗，由《The Fly》驚慄之父David Cronenberg執導，雖然絕對冇任何招牌式肢體變形，但意識上睇到個心唔太舒服。之不過，如果冇咗荷李活，呢個世界就少咗好多樂趣！成王敗寇，為咗小金人，為咗唔得失我哋呢啲影癡，明星名人搞到壓力爆煲，係意料中事。而主角之一Julianne Moore今次都搏到盡，好彩有幾個最佳女演員攞番啫！


個個人心裡都有鬼

《墮》由神秘少女Agatha(Mia Wasikowska)去荷李活尋夢開始，串連起所有人物，但並唔算十分搶鏡，因為有影后Julia Moore。佢飾演過氣明星Havana，為咗爭取亡母成名作翻拍權，搞到精神錯亂，阿媽嘅鬼魂仲會失驚無神出現奚落自己，惟有麻醉於藥物同濫交，最後不惜出賣Agatha。Havana表面人品唔錯，但其實假到死，Julia Moore演起上來毋庸置疑，但佢年過半百，幾乎三分二時間只係著住see through睡衣同底衫褲通屋走，仲有幾幕露骨場面，白到幾乎見血管嘅皮膚滿布雀斑，如果係大銀幕，不得了！


犯眾憎人辦

另一個角色就更加乞人憎，15歲「大爺」Benjie(Evan Bird)，早早成名嘅佢狗眼看人低，一唔like就粗口回敬，務求令身邊人無地自容，吹水唔使抹咀，夜蒲吸毒當食生菜。有幾場戲都幾好笑，就係同經理人阿媽同枱食飯，永遠都係講片酬。同樣，Benjie成日都見到啲污糟嘢，因為呃得人多！雖然阿爸係鼎鼎大名嘅星級治療師(John Cusack)，但似乎就幫唔到自己，最後鑄成大錯，連阿媽都保佢唔住！

戲如人生，明星私生活俾狗仔隊踢爆大造文章，觀眾邊鬧邊睇，齊齊墮落。既然大家鍾意，又何苦潔身自愛？


文：葉紫微