20171029-搭訕練習：「泥鯭的」揸fit司機：做人唔係咁做嘅﹗
搭訕練習：「泥鯭的」揸fit司機：做人唔係咁做嘅﹗
12:54 29/10/2017
（插圖//Stella So）
【明報專訊】「搭訕練習」在上期踏出第一步，撞板多次終於成功。
這個練習開始交棒，今次邀請了與記者合作無間的編輯小妹阿文參與。
報館編輯，尤其負責新聞版面的，都是夜行動物，下班已凌晨。阿文住得離公司頗遠，是到鬧市搭「泥鯭的」回家的常客，與幾名陌生人同行，付二十多元，便免受通宵巴兜路的折磨。
她剛入行時乘巴士，試過一時下班，四時才到家，轉乘的士，車程不到一小時。
「泥鯭的」路線固定，司機來去幾個臉孔，她說有人愛「查家宅」，問她哪兒畢業、做什麼工作；有人會順道載妻子回家，妻子在前座幫忙找零錢；有人用手機看情色小說，開車便匆匆關掉熒幕。
有位司機大哥，似乎特別有個性。
有一次她坐後座最右邊，司機背對她，用耳機在聊電話，語氣豪邁：「做人唔係咁做嘅，你嗌佢嚟搵我，我揸埋呢轉就去同佢講。」
她眼光移向車頭，又見到小和尚擺設，抑制不了聯想，「蠱惑仔沉不住氣搵人開拖，信佛的江湖大佬教小弟做人」，「總之佢就好講雷，好有江湖味」，她這樣介紹心中的搭訕目標，認為司機是個外冷內熱的漢子。
同你介紹返搭訕計劃
Q1：你估計搭訕難度是多少？（5*為最難）
A：*****
泥鯭的司機要搵食，目標人物又cool，不苟言笑嗰隻，但我見過佢同行家嗰仔傾偈又雞啄唔斷，所以完全屬於外冷內熱。
Q2：你在什麼時間和地方會遇到他？
A：放工搭泥鯭的歸家，搭咗三年，互相都認得。
Q3：為什麼會留意到他？
A：因為佢好矛盾，我聽過佢同人講電話（馬路安全當然係戴耳機） 講啲江湖事，教後生「做人」；佢架車擋風玻璃平台又放滿佛像、打功夫的小和尚，疏落有致咁擺，即係佢有花小巧思。
Q4：請舉出三件你想知道他的事情。
A：一、以前真係混江湖嗎？二、揸緊車嘅時候諗咩？三、 瞓覺質素點？
Q5：曾經出現你與他對話或差點可對話的時刻嗎？
A：無。因為佢cool，唔同有啲司機大哥係活潑嘅，會主動傾兩嘴，而司機唔主動我都無咩好主動，一架的士五個乘客，喺陌生人面前有點……
Q6：你想像他的生活是怎樣的？
A：會覺得佢日日豆腐火腩飯食茶記，又覺得佢似有個賢內助，可能係年輕嗰陣畀佢嘅不羈吸引嘅良家婦女嗰類呢（認真），兼佢架車無咩汗味、怪味。
Q7：請猜猜他擁有的三個特點。
A：一、 直接。二、講「雷」（有義氣）。三、愈相處愈有味道。
Q8：請選一種顏色代表你自己和搭訕對象的個性，說說原因。
A：我係灰色，我喜歡Punk rock，但我只是讀者。司機是橙紅色，一來是的士的顏色，二來佢係唔聲唔聲爆發的熔岩。
註：按以上8條問題填妥問卷，可寄「柴灣嘉業街18號明報工業中心A座17樓 星期日生活收」或電郵至sunday@mingpao.com，或在facebook私訊「星期日生活 Sunday Mingpao」，記得留下聯絡方法
搭訕目標 感覺似吳岱融
趁着例假，我與阿文比平日到車站的時間早了些出動。午夜十二時許，白晝黑夜，兩個世界，這個鐘數對編輯而言未算晚，繁華鬧區的玩樂伴侶、加班男女，逐漸流向一條街，「泥鯭的」生意開始了。街道右邊三架，左邊兩架，打車尾燈的便是排頭位，乘客懂得先上那一輛。我們站在路的右邊。
我問怎樣認得目標人物？「有冇話似邊個明星？」阿文苦思一番，似近來電視劇中的吳岱融。咁有型？感覺似，感覺。排較後的兩個司機趁空檔下車吹個水，真是搭訕的好時機。「咦」，阿文忽然緊張：「死喇，係咪佢呢？」正閒聊的司機一個微胖，而她看向個子不高的另一人，我不禁問「又話吳岱融？」「又好似唔係。」她或許認錯人，猶豫之間，疑似目標已開車走了。
我們於是走向微胖司機，阿文開口說自己往常是乘客，我搭嘴，「我是記者，她是編輯」。「你想訪問我？最好唔好訪問我啦。」點稱呼？他說「的士佬」。阿文：「其實我們想等一個司機大哥，車頭好多佛像公仔、打功夫小和尚。」「佛像公仔？係咪好多公仔就唔知，但有人信佛。」「其實我懷疑係咪剛剛同你傾偈個大哥，似係佢。」「佢都唔係信佛。」
「呢條線走緊下坡」
「的士佬」在這條路線做了十幾年，「呢條線走緊下坡，我𠵱家先第一轉，少咗好多客，好多司機走咗去做折頭車，八五折啊，八折啊。仲有啲人夜生活少咗，又有的士app」。說到Uber，他有些生氣，說保險根本不一樣。轉轉話題，平時阿文這類客人多嗎？他認得這個客仔，「呢啲純情樣、斯文樣，應該係揸筆搵食或者做寫字樓啦，呢度咩人都有嘅」。到他開工了，「唔好意思，你等多陣啦」。
我們盯緊駛進的每輛的士，又要扮不經意，站得累了，到對角小食店篤串魚蛋，買杯珍珠奶茶，呃得兩張膠椅坐坐。我說，像我們這樣一對眼鏡妹，做私家偵探都幾適合。她談起愛看推理小說，本格派、社會派，滿腦是故事，「像香港這樣的地方，很難想像金田一那般雪中山莊發生的故事」，的士倒似密室場景。
目標確認﹗
消夜吃過，我們回到原處「監視」。疑似目標車完一轉又出現，和一名年輕司機在聊天。阿文決定走近探問，「我平時都係泥鯭的乘客……」疑似目標開口，「做咩呀？」「我哋有個古仔想搵平時冇交流嘅人溝通下……」「唔溝通㗎，我開車喇。」說着上車，真有點cool。我們轉向旁邊的年輕司機，說在找一個人，車頭放很多公仔，他答「直頭係佢啦」，阿文探頭看看目標司機車頭，終於認得和尚公仔，我們一直等的根本就在眼前！此刻目標在車裏帶點促狹表情，開車前揚揚手與年輕司機說：「你同佢溝通啦。」聽語氣確有點氣概。車走後，阿文才嘆：「果然車內車外看到的不一樣呢。」
落車唔講唔該 司機會生氣嗎？
年輕司機叫阿金（化名），三十來歲，本來揸貨van，轉揸的士「唔使搬，唔使身水身汗」，每晚開工十二小時，下午五時開始在外邊兜客，十一時回來排隊至凌晨二時左右，「呢四個鐘返嚟hea下，落地輕鬆下，如果唔係十二個鐘係咁坐，個『籮柚』好痛」，這是他「釣泥鯭」的原因。揸的士是不是很自由？「其實都唔係，好多人問過我呢個問題，望住個咪錶做人，唔夠數點自由？去埋站、搵客啦。」我們搭訕着，一會才察覺編輯小妹還處於驚呆中：「我頭先認唔出司機，好痛苦呀。」阿金細問為何要找那名司機，我們簡單介紹再追問：「佢係咪大佬嚟㗎？」
「佢係呢條線揸fit嘅。」總算收到風，阿文高興自己眼光獨到，好奇心再度燃起，回神主動問阿金一個原本為「揸fit人」預備的問題：「如果我落車講唔該司機，司機會點諗？」如果乘客不講，會生氣嗎？阿金不介意，「呢個關乎個人修養問題啫。有啲司機收錢會講多謝，咁如果司機唔同你講多謝，你會唔會嬲吖？」阿文：「又係喎……」阿金哈哈一笑，輪到他載客，轉身開門上車，身上T恤背面印着The perfect way to travel through time。
「的士佬」的囑咐
後來「的士佬」一轉車後與我們再遇，向他打聽「揸fit人」，「佢個人冇乜嘢嘅，有時粗口兩句囉。」很有義氣？「都算啦，你知啦粗人講說話都係粗啲」。不過健談的他與我們由供車談到買樓，由早上回家看韓劇，說到日夜顛倒，犧牲與家人溝通時間，話題換幾番，甚至講到不少人覺得年輕一輩英文不太好，教我們有關時間的秘訣，「多啲用past tense，好多嘢都係past tense」。
搭訕機會也變成了過去式，揸fit人始終沒有回來。第二晚，我們原地再等亦無果，跟司機們都互相認得，「的士佬」囑咐「純情」的我們早點歸家，卻不知大家都是夜行族群。又一個深宵將盡，阿金離遠見到我們，就叫「仲未等到呀？」我大聲回應「唉，係呀」，彷彿是鄰居，他說：「飯都未食呀我。」寒暄中隨手遞出一粒薄荷糖，我接過放進口。未能知道揸fit人的故事，阿文說欠緣分。有緣是，我們與這些司機們一起過了兩個深夜的生活。
文//玲子
插圖//Stella So
編輯//王翠麗
fb﹕http://www.facebook.com/SundayMingpao
12:54 29/10/2017
（插圖//Stella So）
【明報專訊】「搭訕練習」在上期踏出第一步，撞板多次終於成功。
這個練習開始交棒，今次邀請了與記者合作無間的編輯小妹阿文參與。
報館編輯，尤其負責新聞版面的，都是夜行動物，下班已凌晨。阿文住得離公司頗遠，是到鬧市搭「泥鯭的」回家的常客，與幾名陌生人同行，付二十多元，便免受通宵巴兜路的折磨。
她剛入行時乘巴士，試過一時下班，四時才到家，轉乘的士，車程不到一小時。
「泥鯭的」路線固定，司機來去幾個臉孔，她說有人愛「查家宅」，問她哪兒畢業、做什麼工作；有人會順道載妻子回家，妻子在前座幫忙找零錢；有人用手機看情色小說，開車便匆匆關掉熒幕。
有位司機大哥，似乎特別有個性。
有一次她坐後座最右邊，司機背對她，用耳機在聊電話，語氣豪邁：「做人唔係咁做嘅，你嗌佢嚟搵我，我揸埋呢轉就去同佢講。」
她眼光移向車頭，又見到小和尚擺設，抑制不了聯想，「蠱惑仔沉不住氣搵人開拖，信佛的江湖大佬教小弟做人」，「總之佢就好講雷，好有江湖味」，她這樣介紹心中的搭訕目標，認為司機是個外冷內熱的漢子。
同你介紹返搭訕計劃
Q1：你估計搭訕難度是多少？（5*為最難）
A：*****
泥鯭的司機要搵食，目標人物又cool，不苟言笑嗰隻，但我見過佢同行家嗰仔傾偈又雞啄唔斷，所以完全屬於外冷內熱。
Q2：你在什麼時間和地方會遇到他？
A：放工搭泥鯭的歸家，搭咗三年，互相都認得。
Q3：為什麼會留意到他？
A：因為佢好矛盾，我聽過佢同人講電話（馬路安全當然係戴耳機） 講啲江湖事，教後生「做人」；佢架車擋風玻璃平台又放滿佛像、打功夫的小和尚，疏落有致咁擺，即係佢有花小巧思。
Q4：請舉出三件你想知道他的事情。
A：一、以前真係混江湖嗎？二、揸緊車嘅時候諗咩？三、 瞓覺質素點？
Q5：曾經出現你與他對話或差點可對話的時刻嗎？
A：無。因為佢cool，唔同有啲司機大哥係活潑嘅，會主動傾兩嘴，而司機唔主動我都無咩好主動，一架的士五個乘客，喺陌生人面前有點……
Q6：你想像他的生活是怎樣的？
A：會覺得佢日日豆腐火腩飯食茶記，又覺得佢似有個賢內助，可能係年輕嗰陣畀佢嘅不羈吸引嘅良家婦女嗰類呢（認真），兼佢架車無咩汗味、怪味。
Q7：請猜猜他擁有的三個特點。
A：一、 直接。二、講「雷」（有義氣）。三、愈相處愈有味道。
Q8：請選一種顏色代表你自己和搭訕對象的個性，說說原因。
A：我係灰色，我喜歡Punk rock，但我只是讀者。司機是橙紅色，一來是的士的顏色，二來佢係唔聲唔聲爆發的熔岩。
註：按以上8條問題填妥問卷，可寄「柴灣嘉業街18號明報工業中心A座17樓 星期日生活收」或電郵至sunday@mingpao.com，或在facebook私訊「星期日生活 Sunday Mingpao」，記得留下聯絡方法
搭訕目標 感覺似吳岱融
趁着例假，我與阿文比平日到車站的時間早了些出動。午夜十二時許，白晝黑夜，兩個世界，這個鐘數對編輯而言未算晚，繁華鬧區的玩樂伴侶、加班男女，逐漸流向一條街，「泥鯭的」生意開始了。街道右邊三架，左邊兩架，打車尾燈的便是排頭位，乘客懂得先上那一輛。我們站在路的右邊。
我問怎樣認得目標人物？「有冇話似邊個明星？」阿文苦思一番，似近來電視劇中的吳岱融。咁有型？感覺似，感覺。排較後的兩個司機趁空檔下車吹個水，真是搭訕的好時機。「咦」，阿文忽然緊張：「死喇，係咪佢呢？」正閒聊的司機一個微胖，而她看向個子不高的另一人，我不禁問「又話吳岱融？」「又好似唔係。」她或許認錯人，猶豫之間，疑似目標已開車走了。
我們於是走向微胖司機，阿文開口說自己往常是乘客，我搭嘴，「我是記者，她是編輯」。「你想訪問我？最好唔好訪問我啦。」點稱呼？他說「的士佬」。阿文：「其實我們想等一個司機大哥，車頭好多佛像公仔、打功夫小和尚。」「佛像公仔？係咪好多公仔就唔知，但有人信佛。」「其實我懷疑係咪剛剛同你傾偈個大哥，似係佢。」「佢都唔係信佛。」
「呢條線走緊下坡」
「的士佬」在這條路線做了十幾年，「呢條線走緊下坡，我𠵱家先第一轉，少咗好多客，好多司機走咗去做折頭車，八五折啊，八折啊。仲有啲人夜生活少咗，又有的士app」。說到Uber，他有些生氣，說保險根本不一樣。轉轉話題，平時阿文這類客人多嗎？他認得這個客仔，「呢啲純情樣、斯文樣，應該係揸筆搵食或者做寫字樓啦，呢度咩人都有嘅」。到他開工了，「唔好意思，你等多陣啦」。
我們盯緊駛進的每輛的士，又要扮不經意，站得累了，到對角小食店篤串魚蛋，買杯珍珠奶茶，呃得兩張膠椅坐坐。我說，像我們這樣一對眼鏡妹，做私家偵探都幾適合。她談起愛看推理小說，本格派、社會派，滿腦是故事，「像香港這樣的地方，很難想像金田一那般雪中山莊發生的故事」，的士倒似密室場景。
目標確認﹗
消夜吃過，我們回到原處「監視」。疑似目標車完一轉又出現，和一名年輕司機在聊天。阿文決定走近探問，「我平時都係泥鯭的乘客……」疑似目標開口，「做咩呀？」「我哋有個古仔想搵平時冇交流嘅人溝通下……」「唔溝通㗎，我開車喇。」說着上車，真有點cool。我們轉向旁邊的年輕司機，說在找一個人，車頭放很多公仔，他答「直頭係佢啦」，阿文探頭看看目標司機車頭，終於認得和尚公仔，我們一直等的根本就在眼前！此刻目標在車裏帶點促狹表情，開車前揚揚手與年輕司機說：「你同佢溝通啦。」聽語氣確有點氣概。車走後，阿文才嘆：「果然車內車外看到的不一樣呢。」
落車唔講唔該 司機會生氣嗎？
年輕司機叫阿金（化名），三十來歲，本來揸貨van，轉揸的士「唔使搬，唔使身水身汗」，每晚開工十二小時，下午五時開始在外邊兜客，十一時回來排隊至凌晨二時左右，「呢四個鐘返嚟hea下，落地輕鬆下，如果唔係十二個鐘係咁坐，個『籮柚』好痛」，這是他「釣泥鯭」的原因。揸的士是不是很自由？「其實都唔係，好多人問過我呢個問題，望住個咪錶做人，唔夠數點自由？去埋站、搵客啦。」我們搭訕着，一會才察覺編輯小妹還處於驚呆中：「我頭先認唔出司機，好痛苦呀。」阿金細問為何要找那名司機，我們簡單介紹再追問：「佢係咪大佬嚟㗎？」
「佢係呢條線揸fit嘅。」總算收到風，阿文高興自己眼光獨到，好奇心再度燃起，回神主動問阿金一個原本為「揸fit人」預備的問題：「如果我落車講唔該司機，司機會點諗？」如果乘客不講，會生氣嗎？阿金不介意，「呢個關乎個人修養問題啫。有啲司機收錢會講多謝，咁如果司機唔同你講多謝，你會唔會嬲吖？」阿文：「又係喎……」阿金哈哈一笑，輪到他載客，轉身開門上車，身上T恤背面印着The perfect way to travel through time。
「的士佬」的囑咐
後來「的士佬」一轉車後與我們再遇，向他打聽「揸fit人」，「佢個人冇乜嘢嘅，有時粗口兩句囉。」很有義氣？「都算啦，你知啦粗人講說話都係粗啲」。不過健談的他與我們由供車談到買樓，由早上回家看韓劇，說到日夜顛倒，犧牲與家人溝通時間，話題換幾番，甚至講到不少人覺得年輕一輩英文不太好，教我們有關時間的秘訣，「多啲用past tense，好多嘢都係past tense」。
搭訕機會也變成了過去式，揸fit人始終沒有回來。第二晚，我們原地再等亦無果，跟司機們都互相認得，「的士佬」囑咐「純情」的我們早點歸家，卻不知大家都是夜行族群。又一個深宵將盡，阿金離遠見到我們，就叫「仲未等到呀？」我大聲回應「唉，係呀」，彷彿是鄰居，他說：「飯都未食呀我。」寒暄中隨手遞出一粒薄荷糖，我接過放進口。未能知道揸fit人的故事，阿文說欠緣分。有緣是，我們與這些司機們一起過了兩個深夜的生活。
文//玲子
插圖//Stella So
編輯//王翠麗
fb﹕http://www.facebook.com/SundayMingpao
留言
張貼留言