20171015-吹水王‧泰利@國際電影吹水王：「國際電影吹水王」評論 : 《銀翼殺手2049》(BLADE RUNNER 2049)

吹水王‧泰利@國際電影吹水王：「國際電影吹水王」評論 : 《銀翼殺手2049》(BLADE RUNNER 2049)
20:07 15/10/2017


《Blade Runner 2049》故事設定於原作時空嘅30年後，經過當年嘅生化人叛變後，LAPD對於舊版生化人「Nexus 8」嘅狩獵仍然持續。擔任「Blade Runner」追捕生化人嘅Agent K(Ryan Gosling飾演)響某次追捕一生化人時，發現有舊版生化人竟誕下下一代嘅証據。「生化人產子」有如聖母童貞產子般不可思議， Agent K奉命對事件進行秘密搜查，因而驚動以Wallce(Jared Leto飾演)為首嘅製造生化人公司，意欲刺探舊版生化人嘅奧秘。Agent K愈益追查，發現事件可能與自己嘅記憶有關，甚至與當年帶著生化愛人出走嘅前度「Blade Runner」Deckard (Harrison Ford飾演)有關…..

《Blade Runner 2049》最聰明之處，係搵咗Denis Villeneuve呢位新晉未來電影大師執導。由《Enemy》《Prisoners 》《Sicario 》到《Arrival》呢幾部作品，大家都見到Denis Villeneuve響處理不同類材時，既有對題材嘅不同視野、處理(《Enemy》嘅留白、《Prisoners 》《Sicario 》嘅氣氛、《Arrival》嘅叙事結構)，亦對其電影語言維持到一定嘅個人風格，一種傾向Art-house處理、沉鬱、壓抑、文藝化嘅電影語言，頗能為類型片題材注入新鮮感。加上佢本身都係一位視覺系導演，注重故事內容及演員表演之餘，亦著重影像嘅傳意能力，亦相當適合拍攝《Blade Runner》對視覺映象要求極高嘅作品。而Denis Villeneuve執導本片出嚟嘅成績，亦係佢水準之上。事實上佢嘅電影語言，更能貼近故事原著者Philip K.Dick嘅原著小說。原著《 Do Androids Dream of Electric Sheep? 》嘅故事其實係一個未來中產探員嘅一場個人夢囈式反思，對未來社會以及生化人嘅生態作出嘅個人思考。只係當年被改編成電影《Blade Runner》時，改寫成生化人叛變為經、探員與生化人對生存方式進行反思嘅商業片式故事。《Blade Runner 2049》可謂將故事由Ridley Scott式嘅商業科幻片，還原至跡近原著嘅文藝式處理。

舊作《Blade Runner》響35年前面世，為觀眾帶嚟一個前所未有嘅未來世界。片中2019年嘅洛杉磯，揉合咗未來派嘅建築、東方元素、普普藝術，創出一個拼貼式嘅後現代社會(不厭其煩地指出一點， 《Blade Runner》嘅城市景觀，頗大程度上取經自香港)，影響咗好幾代嘅影視文化創作人，以及一大堆Cyber-Punk式作品(如年前剛拍完真人版嘅日本漫畫《攻殼機動隊》)。但《Blade Runner 2049》響呢方面，則無法開創出如《Blade Runner 》般超越時代、石破天驚嘅未來景觀。甚至， 《Blade Runner 2049》有頗多嘅二手或與其他科幻作品嘅類同元素，例如影片其中一條「尋父」線，響處理上就明顯參考咗 Francis Ford Coppola嘅經典電影《Apocalypse Now》 (或其原著小說《Heart of Darkness》)；全片較為感人嘅一段、Agent K與虛擬嬌妻Joi嘅愛情，亦同幾年前嘅電影《Her》有異曲同工之妙。影片只能反映時代而未能超越時代，見呢代人所未見，自然及唔上當年《Blade Runner》帶來開天闢地式嘅視覺衝擊。

不過如果講返影片故事本身，當年嘅《Blade Runner》由於力求響商業同文本內容上取得平衡，因此亦要為影片撰寫一個明顯嘅生化人叛變故事，製造動作場面，而整體影片處理上，亦係Ridley Scott一貫大刀闊斧嘅直叙風格，偏向商業片作法，事後甚至因要滿足不同觀眾嘅要求，。歷年來製作出好幾個剪輯版，引為影迷奇談；而Denis Villeneuve執導《Blade Runner 2049》則更從人物思路出發，中段關於Agent K嘅一段「記憶疑雲」可見導演對於叙事手法嘅純熟(本片對於導演前作《Arrival》，能夠將Flash Forward玩到好似Flash Back咁，區區回憶已經算係碎料)，而且亦不需拘泥以堆砌動作場面吸引觀眾，因此《Blade Runner 2049》響影片嘅完整度、完成度亦稍勝於當年嘅《Blade Runner》。兩代兩部電影，可謂各擅勝場。只係響今日社會上已經有太多科幻寓言故事出現， 《Blade Runner 2049》響文化價值上，亦難免成為洪流中嘅區區一員。


Facebook page :

香港電影吹水王 https://www.facebook.com/confessionmoviejunkiehk/

國際電影吹水王 https://www.facebook.com/confessionmoviejunkieinter/

吹水王‧泰利 https://www.facebook.com/terryboilwaterkinghk/
SHARE:  RATE:12345