20140730-王慧麟：拉倒也不怕

王慧麟：拉倒也不怕
2014年07月30日


好彩響呢度有個專欄，可以同讀者交代周一見三人組之中其中兩個人，好打得同江華副局(當時係署理局長)之情況。
當日會議呢，由於係各自表述，互不引述，所以就唔同大家講，究竟官方講乜嘢。不過，大家可以從下面表述的內容，大致估計得到，官方關心的事項。
首先，我地表述咗公推方案的特點，在於幾個組成部分，包括公推、提委會之提名門檻為八分之一，提委會由董事票轉個人票，以及兩輪投票制。
我覺得要向官方重申呢四大元素係相當重要。因為早一陣子，一直有人認為，四大元素裡面，可以分拆、重組甚至求求其其就當OK。咁樣分拆會將方案搞到支離破碎。後果會點呢？例如將來北京叫人抽走其中一個元素，然後就話，呢個元素係取材自我地方案嘅，跟手就叫我地支持。如果係咁，唔係好通。所以，每一次當有機會見任何組織同埋團體嘅時候，都需要重申呢個立場。
其次，響會面之中，強調咗提名門檻八分之一之重要，因為呢樣嘢係一個底線，唔應該倒退，亦冇得後退。
我覺得應該響會面上，坦誠地講出一個政治現實係好事。因為按過往之經驗，八分之一之門檻雖然高，但亦唔係高到一個地步，令所有不同政治光譜嘅政客無辦法參選。雖然最終上次特首選舉只有兩至三個人參選，但唔代表就要將提委會日後就畀兩至三個人出閘。呢樣嘢係本末倒置。八分之一之門檻，經過佔中運動之國際專家睇過，唔覺得有不合理之限制，符合國際標準。既然係咁，點解要提高門檻呢？因為萬一提高，而又有泛民接受嘅話，泛民啲fans會問，點解咁高都願意食？咁樣又係唔係符合國際標準呢等等。
最後，響會面中，亦講出，袋住先應該係公推方案做起點。
個人覺得，袋住先呢樣嘢，究竟係袋乜嘢先呢？係咪樣樣北方提出嘅東西就照袋呢？係咪上面講嘅嘢就袋呢？好明顯，有啲人會睇，既然北方咁強硬，不如上面有些少讓步就可以先食落肚啦。呢個講法又係好危險。因為講袋住先之理論，都要講究竟日後仲要食幾耐先？鋪鋪都袋住先，袋到幾時至完？Never ending嗎？而且，更加危險嘅係，萬一袋咗之後，下一屆香江之領導，以至北方領導層唔認數又點呢？當然，我都相信唔認數係幾衰仔，但都要清清楚楚要袋幾耐嘛？響唔清唔楚之下袋落去好容易整穿個袋，咁就好弊。
我估各位讀者都睇到，即使係我地講嘅嘢，其實相當溫和，又唔係去金鐘同官員嘈交，但可能大家都feel到，我地講嘅嘢，都同建制之主流，南轅北轍。我覺得大家有咁嘅感覺不足為奇，因為到依家為止，北方都冇響任何立場上，有絲毫退讓嘅跡象。既然上面一直只係講邊啲方案唔得，又冇話邊啲方案得，下面之香江官員，又可以應承到啲乜呢？(二之一)