20140731-王慧麟：世代矛盾的苗頭

王慧麟：世代矛盾的苗頭
2014年07月31日


其實，自從今年中北方人士開始，利用不同方式同手法迫泛民裡面之溫和派，(公開)埋去談判桌談判，裡面已經有一些微妙之變化。
呢度講嘅溫和派，唔係港英舊電池忽然轉身而聲稱自己係溫和派之人士，又或者九七之後忽然跳出來從政之民主派人士，而係響八八直選運動甚至更早之前，已經響香港社會／政治活動已經活躍的朋友。佢地大抵支持民主，但亦接受九七後中共管治香港之法理及政治現實。
呢班朋友，可以追溯到七十年代之油麻地艇戶事件，向港英政府抗爭，而且甚至因為坐旅遊巴過海去示威地點現場之途中，響架旅遊巴上被差人拉晒，告非法集會。所以，佢地都係有抗爭史嘅紀錄。唔好忘記，當時港英公安條例，比依家仲衰多一百倍。呢班朋友之核心，係依家之政黨政客核心，部分專業界別同埋學者。
不過，自從兩年前，佢地支持當時之政改方案，之後畀人搵咗「笨實」(過橋抽板啦，文雅啲)之後，呢班朋友慢慢分道揚鑣咗。大部分朋友呢，走咗去搞佔中，唔再做表面之「溫和派」。部分朋友呢，就去咗真普聯幫手，但就極為淡出，即係開下會出席下咁樣。亦有部分朋友呢，意興闌珊，都會支持一下溫和方案(例如湯Java方案)，但都只係簽個名而已。
於是乎，兩年前呢班朋友團結起來，互相呼應包抄，齊齊營造社會輿論，攜手通過政改之modus operanti，依家斷晒。可以咁講，溫和派經過兩年前之教訓之後，同激進派一樣，已經唔同兩年前一樣，有一種連結的形勢。
香港政治，自八九年之後，非黑即白，無溫和空間。九七後，亦如是。傳媒報道少，所以，外界未必知道溫和派裡面的種種情況。所以，北京舊年開始，想搞政改，成日有一套講法，以為激進派捆綁咗溫和派，令到溫和派唔敢同北京傾。現實唔係咁囉。溫和派之政客，想傾都唔敢傾嘅理由，係以前嗰種溫和連結的態勢無咗，素來論述最強之學者都分開晒，冇人坐低undertake論述部分，幫議員撰文背書搞論述。於是，議員真係驚到時去咗談判之後，冇能力去articulate一套完整之政治論述，所以就縮下縮下咁樣。
七十後以至八十後之溫和派，同由七十年代大學出身，八八直選前後投入政治之人士，佢地之視野同嗰代已經有所分別。當然，表面上佢地仍然唔會話忽然激進抗爭上身，但佢乎之抗爭思路，已經唔係上一代咁樣，響民族、民主及民生(注意呢六個字之次序)方面，以及對中國因素之理解，同埋民主運動本土化／在地化／社區化等亦已經唔同。至於，響民族問題上，已經冇上一輩咁上心。問題係，依家台前之溫和派議員都係五十後六十後居多，所以，有時候即使係溫和派，世代要有共識，已經唔容易！(二之二)