20171230-頭條戲場——《黑暗對峙》今年睇過最振奮的電影

頭條戲場——《黑暗對峙》今年睇過最振奮的電影
2017-12-30


1/6國王建議

■國王對邱吉爾由唔信任到同情，佢提示後者可走入民眾聽取聲音，於是邱吉爾潛入地底搭公共交通工具同市民交流，屬全片最感動一幕，願意聽市民意見唔係個個話事人可以做得到。

        語言的力量有時較武器更強大。二戰前，邱吉爾臨危授命出任英國首相，點解一定要係佢？唔係佢特別叻特別受愛戴，偏偏相反，佢名聲唔好，喺內閣中零威望，無人放佢在眼內，加上佢曾經加入不同黨籍係終極牆頭草，政績亦一塌糊塗。有人以為利用呢位威士忌及雪茄不離口嘅肥佬，可繼續實行綏靖政策跟暴政納粹黨希特拉進行和平談判。But，邱吉爾深信投降死得更慘，記者出身嘅佢用盡心神琢磨文字，利用振奮人心嘅演辭改寫世界歷史。（1月4日上映）撰文︰廖思慧

        從來，用和平嘅方法都不能爭取和平。　究竟要向殘暴嘅納粹黨妥協做俘虜定團結全國人民奮力抗戰？邱吉爾上任後要應付對自己抱懷疑態度嘅國王喬治六世，又要同唔支持自己嘅政黨同僚交手。爛攤子真係好爛，一個老頭子煩惱得只能攬實老婆扭計，最後邱吉爾決定為自由奮戰，結果係點？有讀歷史嘅都好清楚。


攞獎級電影

　　邱吉爾由Gary Oldman飾演，後者完全賦予前者銀幕上的靈魂，一開場你已經無辦法諗起Gary Oldman，獲本屆金球獎影帝提名，應份的。Gary Oldman神之演技簡直無懈可擊，亦為感動人心嘅演辭打晒冷震，全片無任何戰爭場面，單靠不絕嘅爭論營造超壓抑嘅緊張氣氛，睇到內心好萬馬奔騰，勇氣是永恒的，一部好有力好教科書級嘅人物傳記片。


四小時化妝

　　Gary Oldman要變身邱吉爾就需要易容，易容工序繁多，每日要花掉4小時。本片的妝髮設計師Ivana Primorac曾六度獲得BAFTA獎提名。電影開拍後，Primorac每日都要用假髮和髮片，巧妙地將Gary Oldman變成邱吉爾。特技化妝師辻一弘的團隊成員則負責替Gary Oldman「變身」，以他的皮膚紋理為指引，依照每條紋路的位置逐點貼上假體。電影於2016年秋天開鏡，Gary Oldman每日需額外騰出大量時間穿著和卸下假體，工時延長至每日18至20小時。


頭條戲場