20170214-陳思銘：拒離

陳思銘：拒離
2017/2/14 — 9:30

專業風水師仔細研究過我們禮頓道辦公室的每個方位，還記得他遙望著窗外的馬場景色之時，眸色幽深，卻輕嘆無語。

心諗，你唔好玩嘢呀大佬，我擺咗咁多錢落去裝修，你先同我講風水唔得？

「梁師傅，有問題？」我看著他問。

他的目光鎖在我的臉上，數秒後，慢慢側過頭，再次遙望馬場。

馬場的射燈，照亮了星期三晚的跑馬地。

「因為你係老闆，所以呢個辦公室嘅風水既會影響生意，亦會影響你個人，而你個人嘅影響會蔓延至每一個同事。」師傅的語速不徐不疾，眼神隨著那幾隻在馬場拼命奔騰的馬匹，越放越遠。

我對公司二十一位同事一向保持著最高透明度，唯獨是我跟師傅以下這段話，從來沒有勇氣跟他們坦白。

「咁即係點？」我問。

一個慘然的笑容掛在師傅臉上，他緩緩的向著窗邊走前兩步。

「生意會好到不得了，就算你假期嗰陣閂門落閘都會有大把人貢上嚟等住畀生意你。」師傅說。

「喂你頭先嚇死我喇師傅！」心頭的巨石猛然放下，我把右手搭在師傅的右膊，頓時溶化了我們之間那前輩與後輩的隔膜，「有你咁講掂晒啦！」

師傅沒有被我溶化，神情肅穆，眼尾掃過我的右手，說：「陳生，如果你唔介意，唔該……」

我意會到自己過份熱情，立刻拿開自己的臭手。

「希望你明白，凡事有得必有失。」師傅每個字擲地有聲，那個「失」字重重擊入我的五臟六腑。

「失乜嘢？」我幾乎想扯著師傅的衣領問。

「桃花，」師傅終於看著我的眼睛，「唔單止係你嘅桃花，仲係全公司同事嘅桃花，因為正如我頭先講，你個人嘅影響……」

「會蔓延至每一個同事......」我喃喃說。

無言了半分鐘，師傅說：「年輕人事業為重，有桃花未必係好事，女仔呢啲嘢，識吓做個朋友仲好，一旦上身就好煩㗎喇。」

「有冇得化解？」我沒有理會他的安慰，沒有桃花這預言讓我魂不附體。

「聽我講，事業為重啦。」師傅嘗試繼續安撫我，跟著便把左手搭在我的左膊說，「女上身仲煩過鬼上身呀，女上身，打堂齋都唔走㗎。」

我眼尾掃過師傅的左手，說：「師傅，如果你唔介意，唔該……」

現在回想起，已經兩年多沒有見師傅。

跟他羅庚算的一樣，時至今天，公司二十一位同事，十九位單身，一位未進公司前已經結婚，還有一位開始拍拖沒十八天便散了。

如今每年的情人節，公司內的氣氛更像端午節，個個同事好似想投江自盡咁樣。

雖然我信風水，但我更信誠意可以感動蒼天；再講，就算屈原死後也有愛妻送終，冇奶油我仲慘過佢。

所以。

我決定，為自己許下這個獨咒。

古有 Beauty and the Beast，今天有我 Samuel， 和你。

係人都知，玻璃瓶內的紅玫瑰代表著 Beast 的愛情與命運。如果二十一歲之前，在最後一片花瓣凋落那刻，Beast 仍未找到一位愛他的人，他便永遠不能恢復真身。

淒美。

至於我。

希望你唔好覺得我 creepy，明知你當日冇揀我，也厚著臉皮送你這朵花。Emma Watson 和 Alice Eve 說過，典型的英國男孩是內斂含蓄的，所以請你原諒我沒有他們這個特徵，但我一路只係自稱「英國通」，從來冇自稱過係英國人。

也希望你會 appreciate 我遵守承諾，不會在一個公開平台再提及你的名字。你說我太浪漫，其實只說中一半，因為我浪漫得來很理智。請你，請你，請你不要以為我當你是女神，我便會天真得認為你不會撒嬌發脾氣大小二便。I expect every outcome to its worst，even expecting 一個在落妝之後極度樣衰的你。

更希望你不要把我對你的好，純碎看成是追求你的招數。對，的確是招數，但更多是，喜歡一個人的自然反應。那晚你問我，為什麼整家餐廳去到深夜時分也不打烊，你問我是不是收買了餐廳的職員？我說不是，也不算騙你，因為實情是我真的沒有收買餐廳職員，我收買的是餐廳老闆。

Going back to that 獨咒。

如今我鄭重承諾，在這朵水晶玫瑰還沒破掉之前，我會仍然相信，你與我之間是存在著一絲希望的。

一班股東擔心我的姻緣運，極力建議我下年搬 office。

不用了。

我需要的不是桃花，我需要的是你。

祝你情人節快樂。


陳思銘
87年，香港人，仍在創業階段。作者facebook專頁：www.facebook.com/csmsamuel