20170517-梁家傑：未必有緣見普選，促大家守住香港制度

梁家傑：未必有緣見普選，促大家守住香港制度
21:15 17/5/2017


現年59歲嘅公民黨主席梁家傑（圖），身為民主黨派領導，對香港民主進展抱悲觀態度，仲寫文話，除非有奇蹟， 「可見將來香港不會有普選，我未必有緣參與香港普選的一天」，佢只希望各人喺不利民主運動、不宜作無謂犧牲嘅時局下，喺自己崗位守住香港制度同核心價值，為當下年輕人「保住一道氣」。
傑哥噚日喺《蘋果日報》撰文分析時局，Emily 就關心問佢，點解咁悲觀，佢就講笑話，自己只係話「未必」有緣見證普選，唔代表一定唔會嘅。
稱林鄭上台成定局試建「工作關係」公民黨上周舉行黨慶晚宴酒會，領導層同獲邀出席嘅候任特首林鄭月娥有講有笑，引嚟部分民主派批評「互送秋波」。
傑哥就解釋，話林太當選非公民黨所願，但對方未來5年做特首已成定局，公民黨必須嘗試同佢建立「工作關係」、做民生實事，但強調喺大是大非議題上，民主派唔可能妥協，林太依然會「舉步維艱」。
傑哥形容，林太係「小圈子選舉的產物」，公民黨係反對派，所以公民黨「無基礎跟特首合作或完全互信」，重申特首如果想有政治認受性同管治權威，普選始終係不二法門。佢話，如果林太上任後，新政府可以靠自己喺立法會「箍票」，唔需要中聯辦代勞，就可以糾正中聯辦干政歪風，改善行政立法關係。


梁家傑