20160330-渾水：港交所的四道聖旨

渾水：港交所的四道聖旨
2016年03月30日


港交所早前推出案例分析。 (資料圖片)

今個月24日，港交所(388)出了4個類似上市指引的案例分析，一般投資者不會留意，就算專業投資者都唔會留意。證券商對專業投資者有一個確實的定義，例如倉位有800萬元以上，有投資經驗等，聽起上來也發覺專業投資者的專業有點廉價，因為香港符合這些條件的人也不少。
投資者不會去留意，反而是一些行內接觸相關工作，又或者無聊到當睇港交所網頁為興趣的人，就會去望兩眼，我是兩方面都有一點。
凡有重大企業決策，決策都要過聯交所聆訊，負責聆訊的人很矛盾，一方面要按本子辦事，即是按上市規則等條文去處理；另一方面，又要考慮條文外的東西，因為條文好「死」，有好多細微細眼位都要靠人手去處理。
不過，一個決定，有條文的「法」治，又有非條文的「人」治，對公眾來講都幾唔清晰，所以聯交所就要「釋法」。
三不五時，有一些重大事項，例如傳媒關心的股票個案，聯交所都會虛擬一個相似的案例去解釋條文，等公眾知道條文執行上來的「鬆緊」程度。這些例子好有參考價值，因為有時過聆訊就好似「闖關」咁，做多兩手準備點都係好。
今次四道「聖旨」都係講一些「殼」會關心的題材，當然聯交所好避忌唔會用個「殼」字，不過，真相一睇就知龍與鳳。
第一道，係講分拆上市的「啤殼」案例分析；第二至第三道，係講注資和反收購的案例；第四道係講足夠業務運作的案例，好多都係講企業財技的基本知識。我見好多大學師兄弟都以入投行為目標，其實這些公開資料就是投行做IBD的人必須要識，如果有心入行，應該要望熟呢類資料，何況仲要免費喎。
有時從這些案例和港交所的通告，你會嗅到一種無奈，因為港交所要賺錢。條文太緊，佢哋會接少了刁，做少了生意；但太狼死，媒體又會施壓力，變相又要執得緊一些。
最近有一些大比例配股賣殼刁就咁睇，都唔太符合現今指引所描述，但依然照硬闖。條例執行得鬆或緊，也許是周期性。另外，也有一些共通點，就是硬闖關口，也是內地商人為主，莫非佢哋有過人的能耐？


作者為九十後財經傳媒人、粗讀經濟學的偽文青  https://www.facebook.com/muddydirtywater