20141029-王慧麟︰退乜場？

王慧麟︰退乜場？
2014年10月29日


依輪忙搬屋，好多嘢都唔係好理。忽然收到朋友們想搞聯署，心想，莫非係聯署反對美帝以空襲伊斯蘭國為名，實際上殺害無辜之敘利亞平民？原來唔係。睇真啲，係講依家佔領事件應如何解決的聯署。
坦白講，佔領事件響上月發生之後，我初時成日收到要求聯署的電郵，即係嗰啲呼籲冷靜呀，和平撤離呀之類。我初時都好有興趣睇，後來慢慢興趣缺缺，因為聯署需時，單係字眼都要搞一陣，而政治發展就往往快過聯署信嘅簽署速度。有時候發現，當所有人都未回覆晒聯署信之時，封信嘅內容都out咗，真係慘。
不過，當時電郵亂飛，但有一位朋友嘅回應，到依家我仲記得。佢大意係話，大家與其響度簽聯署，不如身體力行，親身到佔領現場，走到群眾前面保護學生？我睇完後，好有同感。坦白講，一個like，一個聯署簽名，只係幾秒鐘的事。但我有另一班朋友，義無反顧，前仆後繼，大家收到臉書消息，就自動自覺去唔同佔領區坐鎮，高度戒備，隨時紮醒起身戰鬥。聯署信唔係唔妥，亦有佢嘅作用，但係，click like幾秒鐘，就當如撐咗學生，講唔通也。
點解依家講唔到退場？
還記得佔領行動第一個周末，忽然全港官商巨賈，有頭有臉兼社會賢達，連港英舊電池都出嚟，要求中環等處之學生同市民一齊撤退，仲繪聲繪影，講到要武力清場咁樣，嚇死人。最後，好在政府原來係無清場計劃，大家鬆一口氣之餘，呢種狼來了式的嚇人做法，有幾個後遺症。首先，呢班社會賢達，響佔領者眼中，已經冇咗公信力。如果佢地依家又企出來，再用道德勸說，希望佔領者走頭，話之係大學校長，一於睬你都傻。
其次，呢件事搞到依家想向佔領地民眾講撤退嘅朋友，非常難開口。老實講，依家如果我呼籲佔領者散水，又假設佔領者用善意角度嚟睇我，會覺得我都係善心嘅，都係出於保護運動的考量，但係，想法有點stupid, sometimes naive, 我估佔領者至多笑笑口唔理。
但假如佔領者認為，要求佢地離開的朋友，背後係未有其他動機，係未又係受某類人士慫恿及指使，係唔係建制嘅鬼呢？咁樣就大件事。佔領者會敵視佢地。於是，任何提出撤退嘅朋友，苦口婆心結果衰咗，隨時千年道行一朝喪，畀人唱一世。
依家呼籲人撤退的朋友，或者都可以想一想，依家係未適合時間，呼籲啲佔領者走呢？而且，依家情況特殊，已經冇一個人有能力叫得郁佔領者。與其在冷氣房內指點江山，係未應該落去佔領區度同佔領人士傾下，聽下意見，然後說服佔領者撤退呢？
咁樣先理解後行動，好過夾硬嚟弄巧反拙。不過，落區嗰陣，仲要預埋，好多村民會反映，寧被鎮壓，不為所動之決心。