20150129-王慧麟： 假議題

王慧麟： 假議題
2015年01月29日


呢期政改好似陷入咗悶局，但係，局外人又點會知道，有些東西在拋來拋去，仍在積極互動之中呢？總結一下，其實泛民真係面對內外夾擊，夾走四票之力度好大㗎。

首先，介紹一下外部勢力。有人話美帝好似好支持831決定。呢點唔敢包。美帝夠話伊拉克領袖薩達姆擁有大殺傷力武器啦？到後來乜都冇，美帝講大話，當食生菜。所以，我有時會睇美帝嘅細路英帝之立場。香港係英帝嘅場，英帝之立場可以成為美帝之標竿。英帝駐港一姐同佢嘅team，最近成日同泛民議員及學者等吹水食飯，仲忙過政改三人組，方向只有一個：袋住先！話晒有啲議員學者，響英國讀書，會唔會有壓力呢？唔知囉。

然後，就要講內部勢力。北方人士有冇發功？梗係有啦。自從佔中前後，上面堅壁清野，連一啲以前可以北上傾嘢嘅人，相信都唔會以身試法，闖下羅湖睇下可唔可以入境，費事煩也。於是，真係可以出入北方嘅「泛民」人士，仲要少咗。有冇發覺，最近原來有自稱「溫和泛民」嘅前議員，同埋有泛民背景嘅學者，飛過上去北京訪問，仲同上面嘅法律界元老平叔見過面。

換言之，上面已經開咗一個溝通引擎，待日後呢班自稱「溫和泛民」嘅人，可以堂而皇之地遊說泛民同埋真正「溫和泛民」嘅人，接受袋住先。

至於北方仲有乜嘢做緊？大家都知道，呢個世界充斥著唔少聲稱或自稱係「中間人」嘅物體，聲稱或自稱係習辦李辦張辦條線，響泛民堆活動，仲講自己可以直上天庭云云。響831之前，真正「溫和泛民」提過唔同方案之時，真係有呢堆人四圍約人食飯吹水。但係831決定之後，呢班友仔真係失咗蹤，再加埋佔中，連影都唔見。

呢期唔知點解，呢班乜辦物辦之「中間人」，開始活躍番。佢地先係以「港獨」為題做包裝邀約會面，後來講講下至講到係政改。畀人印象係，上面真係著緊政改方案是否通過，只要大家努力一下，實現一人一票(下刪一千字)……。總而言之，中間人復出啦。

大家可以估到，由以上蛛絲馬跡睇到，上面有一些人仍然死心不息，想政改通過，正由於佢地真係冇四票袋落袋，於是唯有死死地氣響2022年之普選辦法方面鬆章，改動一下，希望可以爭取多些支持。有人話，點解上面鬆章之時，最重要嘅提委過半數提名至可以出閘嘅條件，死都唔鬆呢？喂！大哥！談判策略嚟㗎，依家爆響口話「過半數」都可以傾，咁樣，北方仲乜嘢籌碼可以退呢？就算可以退，最後一刻至退啦，係咪？所以話，好戲在後頭嘅意思，應該係北方響政改方面有時間表同路線圖，仲可以有得傾，哦！明白。大家剝定花生，睇下邊個轉軚先啦。