20140723-王慧麟 ：真見面假談判

王慧麟 ：真見面假談判
2014年07月23日


依家望番轉頭，原來自好打得同路福西領袖，公布要交政改諮詢報告去搞第一步曲開始，上面新嘅部署已經開始。
首先，上面決定重新畀番三人組一個mandate，即係畀三人組可以有更大嘅角色。之前幾個月，泛民究竟要同戈平叔傾至算數，定係同好打得傾至得呢？建制派固然成日飛上去北京傾，而一啲聲稱同泛民好熟嘅人，都話可以安排泛民同北京相關人士傾，當三人組無到。依家好打得講到明做橋樑，而且三人組四周圍去約人見面，即係話，大家有事幹傾，去搵三人組先啦！
咁樣做，比較正常。個個都繞過三人組上京陳情，咁樣三人組就真係變成橡皮，仲邊有人會尊重佢地呢？
第二，依家三人組四圍約人，究竟要傳達乜嘢訊息呢？我地要先回帶。上星期三人組交數之後，畀人話無料到之後唔夠一日，就有消息人士四圍講，話佢地將會約見一啲人，份名單聽完都幾驚嚇，包括泛民立法會議員，學者方案，仲有就係畀人唱係教壞細路、癱瘓社會嘅佔中三子。呢個消息出街之後，唔夠一日，就傳出德江叔駕臨深圳，親自督師。
點解呢？可以有兩個解讀。正面的解讀係，北京原本希望請西環小明出手邀約泛民傾，其實即係北京同泛民直接傾，但咁樣做，結果都係無能為力，因為泛民之政黨，大部分要求一齊見，同埋公開見。咁樣真係有難度，之後不了了之。其實響呢啲時候，上面要同泛民單獨傾，然後響單獨傾嗰陣傾實質嘢，泛民無人敢承擔也。
依家回歸好打得見面啦！好打得要見面，泛民就冇借口唔去，而且由於好打得已經畀上面交帶咗責任，做下傳話人都可以。最緊要係，泛民一齊去添馬，唔會畀人話出賣民主、密室談判等等。大家要留意，呢一批係政府出去吹出來，第一批見嘅人，畀外界之訊息係，上面希望同泛民有較好之互動，而見學者就表示咗，上面希望大家圍繞住呢幾個方案之原則加大力度傾落去。至於見佔中三子，即係表示上面重視電子公投所反映之民意，因為假如真係近八十萬人出來投票，邊個政權都需要重視。由6月29日到依家三個星期，上面終於都明白，需要重視呢班人的聲音。
當然，看官大可從負面的角度解讀，即係話，北京之腹局早已定奪，有咁保守得咁保守，而且更容不下任何談判。依家呢啲見面，都係造下「秀」，等大家心情好過啲，因為上面唔想畀人覺得，連泛民見都唔見，好似唔係好對路。依家咁著緊安排見面，都係做下樣啫，上面唔想畀市民唱話佢地大石壓死蟹也。
從呢個角度講，好打得都係畀人擺上檯同泛民傾之嘛！大家千祈唔好有咁大期望。響深圳市麗紫路一號打躉嘅清潔阿姐話，依家對於某些中間人嚟講，只係剩番出閘門檻，究竟係提委會過半數，定係之前一路沿用嘅八分之一。依家只係響八分之一至過半數之間爭拗緊。死未？(二之一)


王慧麟