20140829-[AM專訪]悲見香港好大鑊。梁文道：搞到咁局面邊個有著數？

[AM專訪]悲見香港好大鑊。梁文道：搞到咁局面邊個有著數？
2014年08月29日


[AM專訪]人大常委會將於周日就普選框架拍板，連日各方叫陣，大有決戰前夕味道，但台前上演的明明是一場大衛挑戰巨人的強弱懸殊決鬥。長年遊走兩岸三地的文化評論員梁文道，對政改十分悲觀，他直言香港「好大鑊」，因察覺到有一方勢力將香港弄致翻天覆地，他質疑，「香港今日搞到咁局面，邊個有著數？」
文：鄭秀韻      攝：鍾式明


人稱「道長」的梁文道，從事傳媒工作16年，長年筆耕，文章多分析中港台社會動態，對近日鬧得紛擾的政改問題，亦有一番觀察及見解。他早前接受本報專訪，從內地一股肅殺氣氛，談到香港為何失去中間溫和聲音，令政改走向恍如已預見的「死局」。
他指現時內地氣氛空前緊張，出現很多「古靈精怪」的敏感和自我審查，「點解內地咁緊張？並非習近平有好明確命令話邊條路線唔准郁，而係營造一種肅殺氣氛，所有人嘅神經就挑動起嚟，過去嘅極左分子又重新出嚟……」而政治鬥爭最劇烈的時候，意識型態亦必定空前緊張，並興起「維穩經濟」。所謂「維穩經濟」，他舉一個活生生事例，指認識一名江西南昌年輕異見人士，對方因經常批評共產黨及地方政府，長期成為維穩打擊對象，因屢被「國保」騷擾，遂決定離開南昌到北京發展，「點知佢快要走時，『國保』叫佢唔好走，話幾十個兄弟睇你，大家傾deal，甚至有咩合作項目一齊搞……」他以另一例子作比喻，「冇火燭，消防員做乜？」


有人撥火推高中港矛盾
梁文道認為，香港爭取民主與內地緊扣相連，若香港實行一人一票普選特首及立法會，會影響內地各省市年輕人，「佢哋會問點解我哋唔得？」因此，中央將香港政改問題提升到國家安全層面，而且黑白分明，他認為合乎他們的一貫發展邏輯，他更認為，近年中港對立嚴重，是有人刻意挑撥事端，而今年4月內地童在旺角便溺猛地發酵更是事不尋常，他指事件本是小事一樁，內地過去多會以「兩地血濃於水」來小事化無，「但今次唔係，《環球時報》出3日社論鬧香港人，新華社出評論，微博上出『五毛』鬧香港人，即係撥火，唔係收火，中港矛盾佢有份撥火。」他又指網媒《熱血時報》及《輔仁媒體》在內地毋須「翻牆」，「想大陸網民睇到呢啲網站，見到香港班人成日叫你『支那狗』、『蝗蟲』……所以中港矛盾係佢撥出嚟，就係安全問題。」
「呢種對立矛盾推高有咩好處？」他認為正是基於維穩邏輯，他亦察覺今年發生的所有事都很奇怪，「傳統智慧話俾我哋知，七一遊行前中央會派糖嘅，但今次出白皮書；傳統智慧話俾我哋知，如果真係有班人佔中，就好似當年五區公投咁，係play down(淡化)重要性，但大家都知，反佔中只係推高咗佔中嘅意志力同埋度氣……點解佢咁做？同香港後面有啲人做嘢官僚心態有關，呢班官僚同南昌官員一樣，冇事就冇飯開……」


打傳媒學者 失中間聲音
維穩魔爪還伸向傳媒，新聞網站《主場新聞》結業，身為創辦人之一的梁文道，對「主場之死」無透露丁點內情，但斷言肯定與政治原因有關，認為事件達到的效果是香港媒體光譜「唔見咗」，只剩兩極，「今鋪政改好特別地方，有班人講袋住先、或有啲人想有得傾，但好多人話好難……點解冇中間力量？唔會有溫和聲音？係佢自己拆咗……」他指2010年通過政改方案，是因與民主黨傾掂數，當時民主黨是政壇中間力量，首腦是司徒華，「但今日政壇冇咁嘅人，全數歸晒兩邊……」當時除了政治力量，還有輿論力量，「學者聯署，即佔中嗰班，陳健民、戴耀廷，仲有蔡子強、馬嶽，今日班人全部俾你打到變晒敵人，冇埋中間聲音……」
《主場》被滅聲，梁文道曾形容「香港真係好大鑊」，「《主場》本來都企中間位，但佢都容忍唔到，同見佢手法都變咗，從前如果想搞掂一個media，佢唔會用啲方法令到創辦人覺得唔舒服，佢會拉攏你，例如佢可以用銀行想落廣告，呢個先係正路手法，所以今次香港好大鑊，因為以前從來唔係咁玩。」他深信不疑，「肯定依家有一班勢力覺得，愈搞到香港對立好嚴重、推到香港好大鑊，佢愈有著數。」他反覆提出「搞到咁咩人有著數」的疑問，「香港今日搞到呢個局面，一定有好多人攞著數、攞政績，一步一步推，對佢哋嚟講，消滅一個媒體係一個政績，要一個媒體轉軚，又係一個政績，搞個反佔中(活動)，又係政績，全部人都冇諗，呢啲嘢最終構成嗰個好大picture入面，其實對中央有冇好處？都冇好處，對香港亦冇好處，但佢唔理得咁多！」


有可能變「一國一制」
基本法委員會委員劉強早前說，政改最壞打算是「一國兩制」變「一國一制」，梁文道認同這個說法，甚至認為極有可能，他推測政改最壞局面是中央堅持「過半數」提名門檻，佔中必會發生，到時駐港解放軍可能會「影子」出動，「但真正大鑊地方唔係解放軍出，而係清場後要上court，可能搞一、兩年，呢年幾兩年日日有古仔(新聞)，國際媒體當烏克蘭(內戰)新聞咁做，外國勢力有可能變真，真有一班極右人士覺得香港冇掩雞籠，真係嚟到，然後透過香港影響大陸，香港變咗所謂中國版顏色革命嘅前線基地，到時真真正正係國安問題。」
他不排除當出現最惡劣情況時，中央會乘勢重推23條立法，他認為23條與普選分不開，「我成日覺得咩愛國愛港都係假嘅」，他大膽假設，即使今日香港有普選，八成投票選民仍是會選曾鈺成之類的建制派，「但就算係咁，你估選舉會否冇篩選？都唔會，因為安全永遠唔會放心。」


對前景悲觀 中央香港雙輸
梁文道對時局不無感慨，他形容：「我覺得好不幸」，並直言「好悲觀」，「睇住冇晒中間派，最終對中央、對香港都輸！」他續說，「如果中央清醒嘅話，唔應該俾個局面發生到咁情況，但點解會去到咁？我成日覺得有好多我哋估唔到嘅人，可能好多係香港自己人，喺中間攞著數！」他相信整個局面並無預設劇本，可能是陰差陽錯，或有人欺上瞞下、謊報軍情，「即係明明香港冇乜敵對勢力，只係內部矛盾，但愈同上面煲到好勁，佢先有資源、有權、有著數，呢個就係維穩經濟學……」但他諷刺說，「點解過去咁多年中國內部保安維穩開支不停上升？你愈維穩愈唔穩……」
觀乎近日事態發展，佔中看來已無法避免，但後續如何，無人知曉，「大家開始已去到一個地步，冇人再計較實際嘅嘢……大家都唔諗，大家覺得佔中係世界末日，世界末日之後仲有乜好諗……冇人去諗之後點，連建制派都唔諗，推晒啲人出嚟，是非大決戰，之後點？點埋尾？冇人諗……」香港人可做甚麼？「唯有盡量掌握機會，將實況講出嚟，要超越既有嘅意識形態對立……」


後記
末代港督彭定康於96年在其任內最後一份施政報告中曾說——「我感到憂慮的，不是香港的自主權會被北京剝奪，而是這項權利會一點一滴地斷送在香港某些人手裡……」彭定康於18年前所作的預言，看來正在應驗！

-------
中共不論誰上台，誰還是一樣，導致香港在這地步。因為中共是將劇目推倒重來。梁文道可以否定曾生的政改形成香港中間派的消失，但不能漠視現在香港的對立力量是中共落意預見。因為中共認為她自己，敢於果斷的政策可以收拾一切。

梁生忙食四方飯，忘了香港社會現在的面容。唉。